Шымкентте перинаталдық орталықтың босану залдарының бірінде зейнеткер әйел медицина қызметкерлері мен пациенттердің көзінше акушер-гинекологты балағаттап, оған қол көтерген. Кейін ол сотта кінәлі деп танылды, — деп хабарлайды Massaget.kz тілшісі OTYRAR-ға сілтеме жасап.
Жоғарғы сот оның әрекетін ұсақ бұзақылық ретінде бағалаған.
"13 шілдеде таңертең перинаталдық орталықтың екінші қабатында зейнеткер дәрігерге тіл тигізіп, айналасындағыларға құрметсіздік көрсетті. ҚР Әкімшілік құқықбұзушылық туралы кодексінің 434-бабының 1-бөлігіне сәйкес, ұсақ бұзақылық – бұл былапыт сөйлеу, қоғамдық тәртіпті бұзу және өзгелерге құрметсіздік таныту. Мұндай әрекет үшін әкімшілік жауапкершілік көзделген", – делінген сот құжаттарында.
Сот материалдарында зейнеткердің әрекеті дәлелденгені және оның кінәсін мойындап, кешірім сұрағаны көрсетілген.
"Зейнеткер ҚР ӘҚБтК-нің 434-бабының 1-бөлігі бойынша кінәлі деп танылды. Оған 55 048 теңге көлемінде әкімшілік айыппұл салынды. Айыппұлды қаулы заңды күшіне енген күннен бастап 30 күн ішінде төлеу қажет", – делінген хабарламада.
Бастапқыда айыппұл көлемі 78 640 теңге болған, алайда зейнет жасына байланысты 30 пайызға төмендетілген. Қаулы әзірге заңды күшіне енген жоқ.
Аптаның басты оқиғалары мен пайдалы видеоларды көру үшін YouTube арнамызға жазылыңыз
