Дүниежүзілік денсаулық сақтау ұйымы Кенияны адамдағы африкалық трипаносомозды (ұйқы ауруы) қоғамдық денсаулық сақтау проблемасы ретінде жойған ел деп ресми мойындады, — деп хабарлайды Massaget.kz тілшісі.
Осылайша, Кения бұл маңызды жетістікке жеткен әлемдегі оныншы мемлекет болды. Бұл елде 2018 жылы гвинея құрты ауруын жойылған еді.
"Кения үкіметін және халқын осы тарихи жетістігімен құттықтаймын. Кения халқын адамдағы африкалық трипаносомоздан құтқарған мемлекеттердің қатарын толықтырды. Бұл – Африканы ұмыт қалған тропикалық аурулардан арылту жолындағы тағы бір қадам", – деді ДДСҰ бас директоры Тедрос Адханом Гебрейесус
Ауру қалай таралады?
Ұйқы ауруы Trypanosoma brucei деп аталатын қан паразитінен туындайды. Ол адамдарға ауру малдан немесе адамнан паразит жұқтырған цеце шыбыны шағу арқылы таралады. Көбіне ауылдық жерде егіншілікпен, мал шаруашылығымен, балық аулаумен немесе аңшылықпен айналысатын тұрғындар қауіп тобына жатады.
Ауру тек Африка құрлығында кездеседі және екі түрі бар: гамбиенсе және родезьенсе. Кенияда тек шығыс және оңтүстік Африкаға тән родезьенсе түрі (Trypanosoma brucei rhodesiense, r-HAT) тіркелген. Бұл түрі тез өршіп, бірнеше мүшеге, соның ішінде миға да зақым келтіреді. Емделмеген жағдайда бірнеше апта ішінде адам өліп кетуі мүмкін.
Кенияның күрес жолы
Кенияда ұйқы ауруының алғашқы белгілері ХХ ғасырдың басында анықталған. Сол уақыттан бері елде жүйелі бақылау мен алдын алу шаралары жүргізіліп, кейінгі 10 жылдан аса уақыт ішінде жергілікті жаңа жағдайлар тіркелмеген. Кейінгі жағдай 2009 жылы, ал шетелге таралған екі жағдай 2012 жылы Масай Мара ұлттық қорығында анықталған.
Кейінгі жылдары Кения тарихи тұрғыда эндемиялық алты округтегі 12 медициналық мекемеде HAT-қа қарсы бақылауды күшейтті. Бұл орталықтар заманауи диагностика құралдарымен жабдықталып, медицина қызметкерлері ауруды анықтаудың тиімді әдістеріне үйретілді. Сонымен қатар, цеце шыбындары мен мал трипаносомозын бақылау шаралары жүргізілді.
Кения Денсаулық сақтау министрлігінің бас директоры Патрик Амоттың айтуынша, бұл жетістік — билік, ғылыми орталықтар, халықаралық серіктестер мен қауымдастықтардың көпжылдық еңбегінің нәтижесі. Енді ел ДДСҰ ұсыныстары бойынша аурудың қайта пайда болуына жол бермеу үшін тұрақты бақылау жүйесін жалғастырады.
Әлемдік жетістіктер қатарында
Бүгінгі таңда 57 ел кем дегенде бір ұмыт қалған тропикалық ауруды жойған. Соның ішінде 10 мемлекет (оның қатарында Кения да бар) ұйқы ауруын қоғамдық денсаулық сақтау мәселесі ретінде толығымен жойды. Бұл елдер қатарында Бенин, Чад, Кот-д’Ивуар, Экваторлық Гвинея, Гана, Гвинея, Руанда, Того және Уганда бар.
ДДСҰ мен халықаралық серіктестердің қолдауымен Кения алдағы уақытта да қадағалау жұмыстарын жалғастырып, аурудың қайта оралуына жол бермеуді көздеп отыр.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
