АҚШ Президенті Дональд Трамп Калифорниядағы табиғи өрттерден зардап шеккендерге көмек көрсету үшін жиналған 100 миллион доллардың жоғалғанын мәлімдеді, деп хабарлайды KEgemen.kz.
Мемлекет басшысы бұл қаражаттың ізім-ғайым жоғалуын FireAid атты америкалық бастамаға байланыстырып, оны «Демократтар шабыттандырған алаяқтық схема» деп атады. Бұл туралы ол өзінің Truth Social парақшасында жазды.
«FireAid – нағыз апат. 100 миллион доллар жоқ болып кеткен сияқты. Бұл – тағы бір алаяқтық әрекет», – деп жазды Трамп.
Еске салайық, 2025 жылғы қаңтарда Лос-Анджелес маңында болған орман өрттері салдарынан 30-дан астам адам қаза тауып, шамамен 18 мың нысан жойылған еді. Сол кезде бірқатар қоғамдық ұйымдар зардап шеккендерге көмек көрсету үшін қаражат жинауды бастаған.
30 қаңтар күні өткен қайырымдылық концерті барысында танымал әртістердің қатысуымен 100 млн доллар жиналған. Алайда бұл қаражат тікелей зардап шеккендерге емес, бірнеше үкіметтік емес ұйым арасында бөлініп кеткен.
