АҚШ президенті Дональд Трамп The Wall Street Journal (WSJ) газетіне және оның иелеріне қарсы сотқа талап арыз түсірді, — деп хабарлайды Massaget.kz тілшісі.
Сот ісіне себеп болған — WSJ газетінде жарияланған мақала. Онда Дональд Трамптың есімі 2003 жылы Джеффри Эпштейннің туған күнімен құттықтаған адамдардың қатарында аталады.
"Бұл — жала жабумен айналысқан, бүгінде беделінен толық айырылған WSJ-дің, сондай-ақ оның иелері мен серіктестеріне қарсы тарихи сот процесі. Тізімнің басында Руперт Мердок пен Роберт Томсон тұр", — деді Трамп.
Reuters мәліметінше, иск сомасы 10 миллиард доллардан асады.
Трамп бұл мақала арқылы журналистер өзін қаралап, "қаржылай және беделге нұқсан келтірді" деп есептейді.
"Коммерсантъ" басылымының мәліметінше, WSJ мақаласында Трамптың есімі Джеффри Эпштейнге жолданған құттықтауда көрсетілген. Ол құттықтауға қолмен салынған жалаңаш әйелдің суреті тіркелген. Газеттің айтуынша, жазбада "Әр күнің жаңа бір ғажайып құпия болсын" делінген.
Алайда Трамп ешқашан мұндай жазба мен сурет жібермегенін мәлімдеді.
Аптаның басты оқиғалары мен пайдалы видеоларды көру үшін YouTube арнамызға жазылыңыз
