Семейде заманауи жабдықтармен жарақталған жаңа инсульт орталығы ашылады. Жобаны жергілікті билік пен Жапония үкіметінің қолдауымен Семей медицина университеті іске асырады . Мекеме университет госпиталінің аумағында орналасады.
Семей қаласына Хиросима префектурасының губернаторы мен Жапонияның Қазақстандағы елшісі бастаған шетелдік делегация келді. Тараптар Медицина университетімен ынтымақтастықты дамыту мәселелерін талқылап, университет госпиталінде болды. Жапон тарапы жаңа Орталықтың жобасын зерттеп, бастаманы қолдауға дайын екенін білдірді.
Алтай Дюсупов, «Семей медицина университеті» КеАҚ ректоры — басқарма төрағасы:
- Жапониямен ынтымақтастық аясында Жапония үкіметінен шамамен 7 млн доллар көлемінде үлкен грант бөлу жоспарланып отыр. Медициналық құрал-жабдықтар түріндегі грант, соның ішінде жаңа МРТ, КТ-құрал-жабдықтар және басқалары болашақ инсульт орталығын жарақтандыруға, халқымызға сапалы көмек көрсетуге мүмкіндік береді.
Бүгінде Семей қаласындағы жедел медициналық жәрдем ауруханасында инсульт орталығының бөлімшесі жұмыс істеп тұр. Алайда онда орын жетіспейтіндігі айқын сезіледі, палаталар лық толы, ауру деңгейі жоғары күйінде қалып отыр. Сондықтан жаңа орталықтың ашылуы арнайы нақты көмектің қолжетімділігін арттырады.
Хидехико Юзаки, Хиросима префектурасының губернаторы:
- Инсульт мәселесі Жапония үшін де өзекті. Біздің мақсатымыз – ауруларды ерте кезеңде анықтау және пациенттерді сапалы емдеу мен оңалтуды қамтамасыз ету. Біз медицинаның дамуына одан әрі үлес қосуға және Қазақстан-Жапония қарым-қатынастарын нығайтуға дайынбыз.
Инсульт орталығы бұрынғы облыстық оңалту орталығының ғимаратында орналасады. Мекеме 2026 жылдың соңында ғимаратты жөндеп, жабдықтарды орнатқаннан кейін өз жұмысын бастайды.
Авторлары: Серік-Ибраһим Орынбек, Ботакөз Дандыбаева, Медет Өмірханов
