Премьер-министр Ұлытау облысындағы энергетикалық және коммуналдық инфрақұрылымды жаңғырту барысын тексерді. Бұл Президенттің тапсырмасы. Жезқазған жылу электр орталығы былтыр « қызыл аймақтан» шығарылған. Қос қазандық пен екі турбинаға күрделі жөндеу жүргізілген.
Техникалық тозуды азайту үшін аталған шаралар жалғаса береді. Ал мәселені реттеу тарифтерді кезең-кезеңімен өсіру арқылы жүргізілмек. Қазір станция сағатына 175 мегават электр энергиясы мен 363 гигакалория жылу беріп тұр. Орталық аумағында қосымша 75 мегаваттық бу-газ қондырғысының құрылысы басталды. 80 жаңа жұмыс орны ашылады.
Олжас Бектенов Жезқазғанның шаруашылық және ауыз су тазарту нысандарын да аралады. Қаланы тұрақты және сапалы сумен қамту үшін мембраналық технология енгізіліп жатыр. Осылайша, құрылғылардың тозуы 90-нан 37%-ға дейін төмендейді. Бұдан бөлек Премьер-министрге сорғы станциялары, Эскулинск су құбыры мен су тарту құрылыстары туралы ақпарат берілді. Шаруашылық және ауыз су нысандарын жаңғырту кестеден 125 күнге кешіккен. Жұмысшылар да жетіспейді. 300-ден аса адамның орнына 30-ға жуығы тартылған. Үкімет басшысы мердігерге қатысты шұғыл шара қабылдауды тапсырды. Барлық инфрақұрылымдық жобаларды белгіленген мерзімде аяқтауды жүктеді.
