Биыл жаз шығып, жазатайым оқиғалар жиіледі.

Биіктен құлап кеткен бүлдіршіндер саны екі есеге артты. Әсіресе Алматы, Астана секілді алып шаһарларда бұл өте өзекті мәселе.

Шернияз Жалғасбекұлы, тілші:

- Жыл сайын 300-ге жуық бала терезеден құлап мертігеді, мерт болатыны да бар. Әсіресе жаз шығып, күн жылынғаннан кейін бұл трагедия көбейе түседі. Көп қабатты үйдегі балалар үлкендер көзін ала бере мына терезеге қарап ұмтылады. Мұның арты немен аяқталатынын мына сандарға қарап аңғарыңыз.

Былтыр 215 бала биіктен құлап кетті. Өкінішке қарай, оның 13-і өмірімен қоштасты. Қалғанының да сан сүйегі сынды, мертігіп, мүгедек болғандары да бар. Ал биыл жағдай тіпті ушықты. Терезе трагедиясы екі есеге өсті.

215 бала биіктен құлап кетті

Қаза тапты — 13 бала

Жарақаттанды — 202 бала

Зәуре Нуритдинова, ұлттық шұғыл медицинаны үйлестіру орталығы "103" үйлестіру бөлімінің бас маманы:

- Биылғы көрсеткіш 6 айдың қорытындысы бойынша 206 бала тіркеліп отыр. Яғни былтырғы жылмен салыстырғанда биіктіктен құлау көрсеткіші азаймай тұр. Мұндай жағдайлар салынған үйлерде қауіпсіздік шараларының сақталмағаны және ата-аналардың қарауынсыз қалған жағдайда балалардың осындай биіктіктен құлау фактілері көбейіп жатыр.

Астаналық Айгүл Ардагер алтыншы қабатта тұрады. Жаз шыққалы көңілін күдік пен үрей билеп, үш баласы үшін жарғақ құлаға жастыққа тимей отыр. Көзіңде ала берсең, бала біткен терезеге телміруге бейіл дейді.

Айгүл Ардагер, Астана қаласының тұрғыны:

- Телефонға кіріп кететін жағдай болады. Мысалы, бір сағаттап отырып қалуың мүмкін. Сол кезде сен байқамай қаласың. не істеп не қойғанын. Вроде қасыңда отырған сыяқты. Бір қарағанда екінші комнатада жүреді.

Бас қалада 10 бала терезеден құлап, қайтыс болды

Иә әсіресе Алматы, Астана секілді алып қалаларда бұл мәселе өте өзекті. Айтайық, биыл бас қалада 39 бала биіктен құлап, 10-ы қайтыс болды.

39 бала биіктен құлап кетті

Қайтыс болды — 10 бала

Жарақаттанды — 29 бала

Мирас Қадыржан, Астана қаласы ТЖД Сарыарқа аудандық ТЖБ бас маманы:

- Көп қабатты тұрғын үйлерінің тұрғындарына профилактикалық жұмыстар жүргізілуде. 250 аса тұрғын үйлерді аралау жұмыстарын жүргіздік. Оның ішінде 6 мың нұсқама таратылды. Тұрғындарға және ата-аналарға төрағалармен бірлесіп уатсап месенджерлерінде және осындай теледидар арқылы, радио арқылы барлық профилактикалық жұмыстар жүргізілуде.

Қалған қалаларда да қауіп жоқ деуге болмайды. Өңірлерде құрылыс қарқын алып, көп қабатты үйлер көбейгенін ескерсек, бұл мәселеге қайта айналып соғатынымыз анық.

Шернияз Жалғасбекұлы, Асхат Қарақойшиев