Оңтүстік Кореяда тоғызқұмалақ федерациясы ашылды, деп хабарлайды 24kz.
Зияткерлік ойыннан алғашқы жарыс ұйымдастырылды. Елден барған үздік тоғызқұмалақшылар кореялық спортшыларға шеберлік сағатын өткізді.
Владислав Цой, тілші:
- Жарысқа Қазақстан, Оңтүстік Корея, Моңғолия және Үндістаннан келген спортшылар қатысты. Мұнда нағыз шеберлер тоғызқұмалақтан әлем чемпионаттарының жүлдегерлері жиналды. Елімізден Дархан Ануарбеков, Ринат Керейбаев, Аяна Исахан және Гүлнара Базаралиева келді. Ұлттық құраманың бас бапкері Айнұр Жақапбаева кореялық ойыншылардың да алғырлығын атап өтті.
Айнұр Жақапбаева, тоғызқұмалақтан ҚР Ұлттық құрама командасының бас жаттықтырушысы:
- Былтыр 2024 жылы Астанада өткен көшпенділер ойынында бастады деп есептейтін болсақ, бүгінгі таңда көп алдыға жылжыған өте қуанышты айт. Менің ойымша, олар интернет жүйесінде, плей-оффта, гейм-орталықта көптеген біздің спортшыларымен ойнап, практика жинаған сияқты.
Турнирге Моңғолиядан келген спортшылар да қатысты. Оларды Баян-Өлгей аймағының аудан әкімі өзі бастап келді. Тоғызқұмалақ бұл өңірде дамып жатқанын моңғол командасының мүшелері дәлелдеді. Төрт қатысушының екеуі Сеулдегі чемпионатта жүлдеге ие болды.
Болатбек Қарапатұлы, Баян-Өлгей аймағы Өлгей сұмының әкімі:
- Бұл қазақтың ұлттық ойыны болғандықтан, біз 10 000 шақырым жерден келіп отырмыз. Монғолияның Баян-Өлгей деген қазақтар өмір сүретін жерінде сол аймағынан келіп отырмыз. Неге дегенде бұл қазақтың ұлттық ойының ары қарата дамыту үшін, бұны өзіміз көзімізбен көру үшін, неге біз бұны ары қарата өркендетуге болмайды. Корея елінің адамдары ойнап жатқанда біз қазақтар неге ойнамаймыз деген осындай бір ой туындап келгенбіз.
Сеулдегі Қазақстан елшісі Нұрғали Арыстанов жарыс жеңімпаздарын марапаттап, Корея тоғызқұмалақ федерациясының ашылуымен құттықтады. Федерация президенті болып математика және ойындар академиясының директоры О Сан Хи сайланды.
О Сан Хи, Корея Республикасы Тоғызқұмалақ федерациясының президенті:
- Бұл ойын интеллектуалды қабілеттерді дамытады. Бірақ одан да маңыздысы – бізге онша таныс емес елдердің, мысалы, Қазақстан, Қырғызстан, Моңғолияның адамдарымен байланыс орнатуға мүмкіндік береді. Бұған барлығы үлкен қызығушылық танытып отыр. Келесі айда шамамен біздің төрт ойыншымыз Чехияда өтетін тоғызқұмалақ бойынша Әлем кубогына қатысады деп жоспарлап отырмыз. Сол үшін бар күшімізді саламыз.
Қазақстан тоғызқұмалақ федерациясының президенті Әкім Тұрсын кореялық әріптестеріне 20 тоғызқұмалақ тақтасын сыйға тартып, оларға қолдау көрсететінін айтты.
Әкім Тұрсын, ҚР Тоғызқұмалақ федерациясының президенті:
- Біздің тараптан, министрлік тарапынан қолдау болатын себебі бұл бізде осындай турнирлерді жиі ұйымдастыру, халықаралық турнирлерді ұйымдастыру және осы корей елінің спортшыларын сол чемпионаттарға, турнирлерге халықаралық алып келу, сонда қамтамасыз ету. Биыл қыркүйек айында екінші рет дүниежүзілік оқушылар арасындағы чемпионат болады, сол чемпионатқа шақырып жатырмыз қазір, осындай көмектеріміз жалпы осылай болады.
Әкім Тұрсынның айтуынша, әлемнің бірнеше елінде 10-нан астам тоғызқұмалақ федерациясы жұмыс істейді. Сонымен қатар әлемдегі 40-тан астам этноспорт федерацияларында қазақтың осы ұлттық ойыны ойналады.
Авторлары: Владислав Цой, Ольга Лян
