Алматыда Қазақстан халқы Ассамблеясының XXVII сессиясының отырысы өтті.
Жиынға қала әкімі, мәслихат депутаттары, этномәдени бірлестіктердің жетекшілері, қоғам қайраткерлері қатысты. Іс-шараны қоғамдық даму басқармасы ұйымдастырды.
Дәстүрлі жиын Астанада Мемлекет басшысының қатысуымен өткен Қазақстан халқы Ассамблеясының ХХХIV сессиясының міндеттері және оларды жүзеге асыру жолдарына арналды. Басым бағыттардың бірі жастардың басын біріктіру. Қазірдің өзінде Ассамблеяның бастамасымен мегаполистегі 17 жоғары оқу орнында студенттік топтар құрылды.
Рустам Кайрыев, ҚХА өкілі:
- Фактчекинг бағыты бойынша жұмыс әрі қарай жалғасуда. Бүгінде жастар жиі ақпараттық шабуылдарға, жалған мәліметтерге ұрынып жатады. Сондықтан қазіргі таңда жастармен жұмыс істеу аса маңызды. Жастар тек ресми ақпарат көздеріне сенуі керек екенін түсіндіру – басты мақсат.
Ассамблея мүшесі Анастасия Нұғманова мектепалды және мектеп қабырғасында жүрген өзге ұлт өкілдеріне қазақ тілін тегін үйретіп жүр. «Оңай қазақша» авторлық бағдарламасы тек тіл үйретуге ғана емес, қазақтың мәдениетін, салт-дәстүрін насихаттауға негізделген. Бүгінгі жиында ол жұмыс нәтижелерімен бөлісті.
Анастасия Нұғманова, ҚХА мүшесі:
- Ереже жаттатқызбаймын, осы жеті септікті білмесеңдер қазақ тілін меңгермейсіңдер деген нәрсе жоқ менде. Күнделікті қазақ отбасы қалай араласады, қалай сөйлеседі, дәл солай солай оқушылармен сөйлесемін. Өзге ұлт өкілдеріне қазақ тілін үйрететін курстардың қателігі сол деп есептеймін, екі тілде жүргізеді. Тек қана бір тілде жүргізу керек деп ойлаймын.
Қоғамдық келісімді нығайту, этносаралық татулықты сақтау Ассамблеяның басты мақсаты. Сонымен қатар, креативті индустрия саласын дамытуға да басымдық берілмек. Жастарды жұмыспен қамту, тегін психологиялық кеңестер жүйелі жүргізілуде.
Гүлжан Көленқызы, Әбен Нарымбаев
