Ақмола облысында екі ер адам мектеп бітірушіні аяусыз соққыға жыққан , — деп хабарлайды Massaget.kz тілшісі Kokshetau Today басылымына сілтеме жасап.
21 маусымда 18 жастағы бала мектеп бітіру кешінен кейін соққыға жығылған. Бұл туралы оның анасы Инна Паукова әлеуметтік желіде жазды.
"Сол күні кешке 11-сынып бітіріп жатқа менің ұлыма екі ересек ер адам — А (31 жаста) мен В (23 жаста) шабуыл жасады. Олар мас немесе есірткі қабылдаған деген болжам бар. Олардың бірі автокөлікпен Романды қағып өтпек болған. Кейін екеуі көліктен түсіп, ұлымды есінен танғанша аяусыз ұрып-соққан. Осы сәтте оқиға орнында Ақкөл аудандық полиция бөлімінің қызметкері С. болып, шабуылдаушылардан "бәрі дұрыс па?" деп сұраған. Олар дөрекі жауап бергеннен кейін ол ешқандай көмек көрсетпестен, қансыраған ұлымды тастап, кетіп қалған. Кейін полицияға 102 нөмірі арқылы хабарласуға тура келді", – деді жәбірленушінің анасы.
Оның айтуынша, соққыдан кейін ұлы ауруханаға жеткізілген.
"Сол жерге шабуыл жасағандар да келді. Біраз уақыттан кейін олардың таныстары келіп, мені арыз жазбауға үгіттей бастады. Мен бас тарттым. Ауруханада олар агрессив болып, ұлыма тіл тигізді, маған қоқан-лоқы жасады, балағат сөздер айтты, қорқытуға тырысты. Роман көп жарақат алған соң ауруханаға жатқызылды", – деді анасы.
Оның айтуынша, "шабуылдағандар әлі бостандықта жүр".
"Ақкөл аудандық полиция бөлімі маған қылмыстық істің СТБТ-ға тіркелгені туралы хабарлаған жоқ, жеке кабинетімде де іс көрінбеді. Прокуратураға жүгінгеннен кейін ғана істің нөмірін айтты. Осы оқиғаға назар аударуларыңызды сұраймын. ҚР ІІМ, Бас прокуратура, Ақмола облысының әкімі мен Президенттен бұл істі бақылауға алуды сұраймын. Болашақта оқиғаның дамуын жариялап отырамыз", – деді Инна Паукова.
Ал Ақмола облыстық полиция департаменті бұл жайтқа қатысты барлық тарап бірден анықталып, жауап алынғанын мәлімдеді.
"Ақкөл қаласының 2007 жылы туған тұрғынына қатысты бұзақылық әрекеттер бойынша ҚР Қылмыстық кодексінің 293-бабы 2-бөлігі (бұзақылық) бойынша қылмыстық іс дәл сол күні қозғалды. Тергеу барысында оқиғаның мән-жайы анықталып жатыр. Бұл қылмыстық іс облыстық полиция департаменті басшылығының бақылауында", – делінген департамент хабарламасында.
Өзекті жаңалықтарды өз уақытында оқу үшін Facebook парақшамызға жазылыңыз!
