Президент Қасым-Жомарт Тоқаев полицейлер мен мемлекеттік қызметшілерді кәсіби мерекелерімен құттықтады.
Мемлекет басшысы осындай құбылмалы уақытта қоғамдық қауіпсіздікті сақтау, заңның мүлтіксіз орындалуын қамтамасыз ету айрықша маңызды міндет екенін атап өтіп, құқық қорғау жүйесіндегі барлық жауапты құрылымдар жұмыла жұмыс істеуі қажеттігін алға тартты. Елімізде «Заң мен тәртіптің» қатаң сақталуына қоғам өкілдерінің қосар үлесі де орасан зор екендігін жеткізді. Сондай-ақ орталық және жергілікті атқарушы орган басшылары, депутаттар, сарапшылар мен белсенді азаматтар төбе көрсеткен жиынға академиялардың курсанттары да арнайы шақыртылды.
ЦИТАТА. Қасым-Жомарт Тоқаев, Қазақстан Республикасының Президенті
«Соңғы жылдары елімізде барлық салада ауқымды реформалар жасалып жатыр. Мемлекеттің саяси жүйесі мен экономикалық құрылымы түбегейлі жаңғыруда. Ел ішінде жоғары құқықтық мәдениет қалыптасып келеді. Азаматтық жауапкершілік идеологиясы берік орныға бастады. 2019 жылдан бері қылмыстық құқық бұзушылық саны шамамен екі есе азайды. Соның ішінде қарақшылық, тонау, ұрлық пен бұзақылық деңгейі 4 есе төмендеді, ал кісі өлтіруге қатысты қылмыстар 30 пайызға кеміді. Қоғамдық орындардағы қылмыс саны 80 пайызға азайды. Бұл азаматтарымыз көшеде ештеңеден қауіптенбей, алаңсыз жүре алады деген сөз».
