Иран мен Израиль арасындағы әскери шиеленіс Түркияны да алаңдатып отыр.
Ресми Анкара қарулы қақтығыстың кеңею қатеріне байланысты шекарадағы қауіпсіздікті күшейтті.
Ел президенті мен қорғаныс министрі жағдайға қатысты мәлімдеме жасап, халықаралық қауымдастықты шұғыл әрекет етуге шақырды.
Израильдің Иран аумағындағы нысандарға жасаған әуе соққылары Түркияның ресми наразылығын тудырды. Анкара бұл шабуылдарды халықаралық құқыққа қайшы деп мәлімдеп, Иранның өзін өзі қорғау құқығын қолдайтынын жеткізді. Түркия Президенті Реджеп Тайип Ердоған Израильдің әрекетін ашық айыптап, Нетаньяхудың саясатын "басқыншылық" деп атады.
Реджеп Тайип Ердоған, Түркия президенті:
- Нетаньяху геноцидте Гитлерден асып түсті. Оның қолындағы қан тек Израиль үкіметінің емес, сонымен қатар бұл қылмыстарға көз жұма қарап отырған елдердің де мойнында. Түркия бұл зұлымдықты тоқтату үшін барлық дипломатиялық және гуманитарлық жолдарды пайдаланады.
Қазір Түркияның Иранмен шекарасында 60 мыңға жуық әскери қызметкер орналасқан. Қажет болған жағдайда арттырылуы мүмкін. Дрондар мен бақылау жүйелері күшейтілген режимде жұмыс істеп жатыр.
Яшар Гүлер, Түркияның ұлттық қорғаныс министрі
- Әрине қазіргідей жағдайда сақ болу керек. Осы тұрғыдан, Түркия Ұлттық қорғаныс министрлігі мен Қарулы күштері елдің қауіпсіздігі мен тыныштығы үшін тиісті іс-шаралар жүргізіліп жатыр.
Израильдің шабуылы мен Иранның оған қарымта жауабы әлемдік экономикаға үлкен әсер етті. Сарапшылардың пікірінше, шиеленістен Түркияға энергетика бағасының өсуі, туризмнің төмендеуі, сауда мен қаржы нарықтарындағы қиындықтар секілді түрлі қауіп-қатер бар.
Мехмет Шимшек, қаржы және мемлекеттік қор құрылымының министрі:
- Қазір мұнайдың әлемдік бағасы бізге қолайлы деңгейде тұр. Егер қандай да бір мәселе туындаса, қолымыздағы барлық құралдарды пайдаланып, дағдарысты еңсеруге тырысамыз.
Түркия егер Иран Ормуз бұғазын жабатын болса, тиісті шаралар қабылдамақ. Дегенмен, Анкара аймақтағы шиеленісті азайтып, бейбітшілікке қол жеткізу үшін дипломатиялық жолдарға басымдық беретінін айтып отыр.
Меруерт Қанағат
