Орталық Азия мен Қытай арасындағы ынтымақтастықта Қазақстанның алатын орыны ерекше.
Ал Астана мен Бейжің серіктестігі күллі аймаққа үлгі. Қытайдағы Еуразиялық зерттеулер институты директорының орынбасары Шан Юэ арнамызға сұхбат беріп, осындай пікір айтты. Оның айтуынша, Қасым-Жомарт Тоқаевтың "Бір белдеу, бір жол" бастамасын дамыту туралы баяндамасы өте маңызды. Әрі оны Транскаспий дәлізі мен "Солтүстік-Оңтүстік" халықаралық көлік дәлізімен ұштастыру тиімді. Сондай-ақ сарапшы Президенттің энергетика және жасыл технологияларға қатысты ұсыныстарын да жоғары бағалады. Айта кетейік, Шан Юэ халықаралық қатынас, өңірлік қауіпсіздік және ұлы державалар арасындағы бәсекелестікті зерттейді. Сондай-ақ ғылыми және қолданбалы сараптамалық материалдарға үлес қосқан.
Шан Юэ, Қытайдың Еуразиялық зерттеулер институты директорының орынбасары:
- Бұған дейін де байланысымыз берік еді, ал саммит осы серіктестікке серпіліс берді. Сауда, инвестиция және энергетика салаларында Қытай мен Қазақстан ұзақ мерзімді ықпаладастықты табысты жүзеге асырып келеді. Біз дәстүрлі салалардағы байланысты нығайтып, әлеуетін толыққанды қолдануымыз қажет. Болашақта экологиялық таза пайдалы қазбалар, жаңа энергетика, ғылыми-техникалық инновациялар сынды салалар Қытай мен Қазақстан арасындағы ынтымақтастықты жаңа белеске шығаруы мүмкін.
