Елордада екі айдан бері «Бақыт құшағында» мюзиклының түсірілімі жүріп жатыр. Картина түгелімен Шәмші Қалдаяқовтың әндерімен сүйемелденген. Күрделі әрі қызықты жанрдағы туындының түсірілім жұмыстарын тілшіміз де тамашалап қайтты.
200-ге жуық актёр таң алагеуімде Астананың қақ ортасында жиналды. Жаңбыр жауып тұр. Бірақ жалынды жастар үшін бұл кедергі емес. Сценарийдің ізімен би басталды.
«Бақыт құшағында» мюзиклының айтар месседжі көп. Шәмшінің шығармашылығын, қазақтың тілін, өнерін және Астананың сұлулығын паш етпек.
Санат Шапашов, бас продюсер, режиссёр:
Жалпы, негізі басты мақсатымыз, негізгі иедямыз біздің елордамызды, мәдениетімізді көрсету керек. Өйткені, соңғы толықметражды фильм Астанада 15 жыл бұрын түсірілген. Менің басты идеям, мақсатым бүкіл Қазақстанға, мүмкін бүкіл әлемге біздің елордамызды, мәдениетімізді таныту.
Джукбокс мюзикл дегеніміз – танымал әндерді пайдаланатын сахналық қойылым немесе музыкалық фильм. Музыка бар жерде сезім және би болады.
Уәлитбек Сиязбек, хореограф:
Кастинг өте ауқымды өтті. Екі мың бишінің ішінен 50-і ғана таңдалды. Үздіктердің үздігі, әдемілердің әдемісі ғана қатысты. Өйткені, бұл – мюзикл. Үш жанрды қамтиды: актёрлық, би және ән.
Санат Шапашов былтыр «Нью Йорк фильм» академиясында режиссёр мамандығын алды. Дебют үшін күрделі жанрды таңдаған. 23 қазан Шәмші Қалдаяқов дүниеге келген күн. Бұл кино да сол күннен бастап, кинотеатрларда көрсетіледі деп жоспарланып отыр.
Азамат Бейбітұлы
