25 маусымда футболдан Қазақстан кубогы жартылай финалының алғашқы ойындары өтеді, деп хабарлайды Kazinform.
Жарыстың аталған сатысында сағат 18:00-де “Қызылжар” (Петропавл) мен “Ордабасы” (Шымкент), 20:00-де “Тобыл” (Қостанай) мен “Жеңіс” (Астана) ойнайды.
Қарымта кездесу 30 тамызға белгіленген. Ширек финалда “Ордабасы” алматылық “Қайраттан” 1:0 есебімен басым түссе, “Қызылжар” семейлік “Елімайды” пенальти сериясында қапы қалдырды.
Ал елордалық “Жеңіс” және “Астана” кездесуінің негізгі кезеңінде 1:1 есебімен тең түсті. Пенальти сериясында “Жеңіс” жартылай финалға жолдама алды.
Қостанайлық “Тобыл” сырт алаңда түркістандық “Тұранды” 2:0 есебімен тізе бүктірді. Биыл Қазақстан кубогына премьер-лига, бірінші және екінші лигадан барлығы 30 команда қатысты.
Алдымен бірінші және екінші лига командалары алғашқы іріктеу кезеңін өткізді. Олардың арасынан іркілмей шыққан екі клуб 1/8 финалда премьер-лига командалары қатарына қосылды. Жеңімпаз 2026 жылы Конференция лигасының екінші іріктеу кезеңіне жолдама алады.