Халқымыздың аяулы перзенті, әйгілі әнші Димаш Құдайберген Халықаралық көші-қон ұйымының Ғаламдық ізгі ниет елшісі атанды. Бұл шешім бүгін Женевада өткен ұйым Кеңесінің 116-шы сессиясында жарияланды.
Димаш іс-шараға қатысушылар алдында өзінің ең танымал әндерінің бірі «Эс Оу Эс» шығармасын француз тілінде орындады. Жиналғандар қазақстандық әншіні зор қошеметпен қарсы алды. Димашқа Ғаламдық ізгі ниет елшісі мәртебесінің символын Халықаралық көші-қон ұйымының басшысы Эми Поуп табыстады. Ол: «Бұл атақ әншінің мәдени ықпалын, оның азаматтық белсенділігі мен гуманитарлық бастамаларды халықаралық деңгейде ілгерілетуге деген талпынысын көрсетеді», — деп атап өтті. Былтыр Димаш Халықаралық көші-қон ұйымының Азия бойынша Аймақтық елшісі болып сайланған еді. Биыл ұйым оның мәртебесін Ғаламдық елші деңгейіне дейін көтеріп отыр. Димаш өз кезегінде ұйымның гуманитарлық миссиясын алдағы уақытта да насихаттай беретінін жеткізді. Ол жиылған жұрт алдында әдеттегідей қазақ тілінде сөйлеп, көрсетілген құрмет үшін зор алғысын білдірді.
Димаш Құдайберген, Қазақстанның халық әртісі:
- Мен үшін бұл лауазым – өте үлкен мәртебе. Ол ең алдымен біздің сүйікті тындармандарымыздың, біздің көмегімізді қажет етіп тұрған барша азаматтарының аманаты деп білемін. Жалпы кез келген өнер адам үшін белгілі бір миссия өмірінде орналуы өте маңызды деп білемін. Менің миссиям – адамзатты бірлікке шақыру, бейбітшілік жайында үгіт насихат жүргізу. Қазіргі таңда ел мен елдің арасында араза ыстық белен алып тұрған заманда біз өнер адамдары қолдан келгенше татулыққа, бірлікке, ыңтымақтастыққа шақыруға тырысуымыз керек деп ойлаймын.
