Жылу, электр энергия, сумен жабдықтау және су бұру салаларындағы инженерлік желілердің тозуын 40%-ға төмендету үшін елімізге 6,8 трлн теңге көлемінде инвестиция қажет. Бұл қаражат 86 мың шақырым коммуналдық желіні жөндеуге жұмсалады. Бұл туралы Табиғи монополияларды реттеу комитетінің төрағасы мәлімдеді. Ол «энергетика және коммуналдық секторды жаңғырту» жөніндегі ұлттық жобаның жүзеге асуы туралы баяндады. Жылумен жабдықтау саласында желілердің тозу деңгейі 65%-дан, электр энергетикасы саласындағы ескі желілер 70%-дан жоғары. Су жеткізу және су бұру салаларында да осындай жағдай. Сондықтан жаңғырту жұмыстары апаттардың санын едәуір қысқартып, инженерлік инфрақұрылымның жай-күйін заманауи технологиялық деңгейге жеткізуге мүмкіндік береді.
Тимур Қосымбаев, ҚР ҰЭМ Табиғи монополияларды реттеу комитетінің төрағасы:
Ұлттық жоба іске асырылып отырған кезеңінде 2029 жылы бүкіл табиғи монополиялар субъектілерін, инфрақұрылымдық деңгейін 40%-ға дейін жеткіземіз. Осы дәрежеге жеткізген кезде беріліп отырған қызметтердің сапасын көтереміз. Уақытылы берілуін қамтамасыз етеміз.
Ақниет Балтанова
