Үндістанда тасқын мен көшкін салдарынан 1500-ден астам турист Сикким штатында бөгеліп қалды.
Бұл туралы Caravan.kz медиа порталы BAQ.KZ-ке сілтеме жасап хабарлайды.
Үндістанның солтүстік-шығысындағы Сикким штатында нөсер жауыннан кейін басталған су тасқыны мен лай көшкіндері салдарынан 1,5 мыңнан астам турист жолда қалған.
Mint газетінің мәліметінше, туристер тоқтаған аудандарға апаратын жолдар көшкін салдарынан жабылған. Осыған байланысты демалушыларға қонақүйлерде қалып, ауа райының жақсаруын күтуге кеңес берілді.
Үздіксіз жауған жауын мен Тиста өзеніндегі су деңгейінің көтерілуіне байланысты Сикким билігі қызыл деңгейдегі қауіп туралы дабыл жариялады, – делінген басылымда.
Бұған дейінгі мәліметтерге сәйкес, солтүстік-шығыс Үндістанда муссонды жауын-шашын салдарынан орын алған тасқын мен көшкіннен кемінде 32 адам көз жұмған.
Табиғи апат Ассам, Аруначал-Прадеш, Мегхалая, Мизорам және Нагаленд штаттарында да болды. Мыңдаған тұрғын үйлерінен бас сауғалап, қауіпсіз аймақтарға көшуге мәжбүр.
