Қонаевта төтенше жағдай режимін жариялауға дайындық жүріп жатыр, — деп хабарлайды Massaget.kz тілшісі Тиісті қаулы жобасы "Ашық НҚА" порталында жарияланған.
Бұл шешім жобасы қала әкімінің атынан ұсынылып, 2025 жылғы 16 желтоқсанға дейін қоғамдық талқылауға шығарылды.
Жергілікті ауқымдағы техногендік сипаттағы ТЖ енгізу дауылға байланысты жоспарланып отыр: Қонаевта жел көпқабатты тұрғын үйлердің шатырларын жұлып әкеткен.
ТЖ режимі кезеңінде қалада зақымданған үйлердің шатырларын қалпына келтіру көзделген. Ресми мәліметке сәйкес, ТЖ режимі әлеуметтік-экономикалық, құқықтық және басқа да теріс салдарға әкелмейді.
Посмотреть эту публикацию в Instagram
Публикация от Қонаев қаласының әкімдігі (@qonaev_akimdigi)
Қала әкімдігінің дерегінше, Қонаевта 12 желтоқсанға қараған түні секундына 25 метрге дейін жеткен дауыл салдарынан 30-дан аса апаттық жағдай тіркелген. Ауа райының қолайсыздығы қала инфрақұрылымына зиян келтіріп, кей аудандарда электр, су және жылу уақытша өшкен.
Қала әкімі Асхат Бердіханов шұғыл кеңес өткізіп, коммуналдық қызметтерге, энергетиктерге, құтқарушылар мен медицина қызметкерлеріне табиғи құбылыстың салдарын мүмкіндігінше тез қалыпқа келтіруге тапсырды. Қазір апаттардың себептері нақтыланып, келтірілген шығын есептеліп жатыр. Билік жағдай бақылауда екенін мәлімдеді.
Қалада қалпына келтіру жұмыстары жалғасып жатыр: электр желілері жөнделіп, құлаған ағаштар тазартылып, бүлінген құрылымдар мен шатырлар қалпына келтіріліп, көшелер қоқыстан тазаланып жатыр.
Тұрғындар жылу мен ыстық суға да шағымданған. "Жылу Орталығы" өкілдері түнде жарықтың уақытша өшуінен су салқындап кеткенін, қазір жүйе қалыпты жұмыс істеп тұрғанын және ыстық су барлық үйге толық жетуі үшін уақыт қажет екенін түсіндірді.
Қонаевта тұрғындардың өтініштерін қабылдайтын екі жедел штаб жұмыс істеп тұр. Ақпарат тәулік бойы "109 және Қонаев қаласы әкімдігі" WhatsApp тобында жарияланып отырады. Коммуналдық қызметтер күшейтілген режимге көшірілді.
Бұған дейін ТЖ режимі Қарағандыда енгізілген еді. Ол Фёдоров су қоймасы ауданынан өтетін №10 кәріз коллекторының бір бөлігін шұғыл ауыстыру жұмыстарын жүргізіп, апаттың алдын алу мақсатында жарияланған.
Instagram парақшамызға жазылып, ең қызықты ақпараттарды бірінші болып оқыңыз!
