Актёр, ММА шебері Еркебұлан Тоқтар АҚШ-та қазақ спортшыларының сыйлы екенін айтты.


Бұл туралы Caravan.kz медиа порталы хабарлайды.

Жақында ғана “Қазақстанның еңбек сіңірген қайраткері” атағын алған ол Аман Тасығанға берген сұхбатында америкалықтардың қазақстандық боксшыларды жоғары бағалайтынын айтты.

”АҚШ-та қазақ спортшыларына деген көзқарас өте жақсы. Олар біздің мінезді біледі. Маған “сен сенің боксың, күресің қазақша емес, бірақ сенің жүрегің қазақтың жүрегі” деді. Өйткені менің спаррингтарымды көреді ғой. Менің соққыларым қисық, бірақ мен қорықпай кіре беремін. “Сенің жекпе-жектеріңді қарап шықтым, сен жүрекпен ұтып жүрсің. Сенде техника жоқ, қазақтың жүрегімен жеңіске жетіп жүрсің” деді. Ол кісі қазақтың жүрегі дегеннің не екенін біледі. Жәнібекті қарап жүр, Головкинді біледі. Бекзатты қалай сыйлайды. Қазақтарды сыйлайды, жақсы көреді”, — дейді ол.

Өнер иесі өзбекстандықтармен арадағы қақтығыстар қалай пайда болғанын да түсіндірді.

”Мен Ташкентте Абдулазиз Соталгиев деген спортшыны нокаутқа түсірген едім. Содан бері оларда кек қалып кеткен. Соны қайтару керек. Қалай басталғанын білмеймін, бірақ тарап кетті. Мен де жынды емеспін. Маған әлеуметтік желі арқылы мені жекпе-жекке шақырғандарға жауап беремін. Себебі, ол маған да жақсы. “Вызов” тастап жүргендердің көбісі спортта хабары жоқ клоундар ғой. Олар “ойбай, қырам-жоям” дейді. Ал спортшылар шақыруды кәсіби түрде жасайды. Кезінде Қуат Хамитовпен төбелескен мықты боксшы Бабур Абдулазизов бір сұхбатында журналистің “екеуіңіз кездессеңіздер кім ұтады” деген сұрағына жауап береді. “Қазір оның дайындығы өте мықты, ол баяғы актёр емес. 50/50 деп” жауап берді. Кәсіби спортшы солай анализ жасайды. Ал клоундар кейінгі кезде ақшаларын көрсетіп мақтанатын болып кеткен. Маған ондай ешқандай зиян тиіп жатқан жоқ. Мысалы 26-шы желтоқсанда Ташкентте жекпе-жек өткіземін. Оқырмандарымның көбі “Өзбекстанда жауларың көп қой” деп жазып жатыр. Бірақ Өзбекстанда менің жанкүйерлерім де көп. Менің жекеме өзбекше “ұнайсың, күшті” деп жазатындар көп. Өзбекстандық пабликтер менің жекпе-жегімді салып қояды. Пікірлерін оқысаң, “Еркебұлан зор, күшті бала” деп жақсы нәрселер жазады. Өйткені, менің сөздерім түзу. Ешкімнің жекесіне, ұлтына өтпеймін”, — дейді ол.