Атырау облысында металл жонушы мамандығына сұраныс артып келеді. Қазір мұнай-газ және машина жасау кәсіпорындарында 150-ден астам жонушы жетіспейді. Осыған орай Доссор кентіндегі колледжде осы салада маман дайындайтын 10 айлық курс ашылды.
Қазір 18 студент дуалды оқыту жүйесі арқылы кәсіпорындарға орналасты. Келер жылдан бастап олардың қатарын екі есе көбейту жоспарланған. Жалпы Доссордағы колледжде 180-нен астам студент алты мамандық бойынша оқып жатыр. Кәсіптік бағдар беретін оқу орны болашақта жергілікті еңбек нарығына қажетті мамандарды дайындауға басымдық бермек.
Ізтұрған Тасбаев, колледж директоры:
- «Теңіз» кәсіпорны өз қаражаттарына оқытуға қазіргі таңда 20 студентке өтінім беріп қойды. Оны қаңтар айынан бастап іске асырамыз деп отырмыз. Қазіргі таңда алты жонушы станок орнатылған. Сонымен қатар бұрғылау станогы мен тегістеу станогы бар. Мұнда балалар темір жонушыға қажетті бұйымдар жасау, тесу, кесу секілді кәсіптің бәрін толықтай меңгеріп шығады.
