Қазақстан Президенті Қасым-Жомарт Тоқаев пен Ресей Президенті Владимир Путин келіссөз жүргізді.
Кездесу барысында мемлекет басшылары екі ел арасындағы стратегиялық серіктестік пен одақтастық қатынастарды тереңдету мәселелерін талқылады, деп жазады inbusiness.kz сайты.
Қасым-Жомарт Тоқаев өз сөзінде Ресей тарапының жоғары деңгейдегі қонақжайлығы мен сапарды мұқият ұйымдастырғанына алғыс білдіріп, бұл сапарды биылғы ең маңызды оқиға деп атады.
Президент екі ел арасындағы байланыстар барлық салада табысты дамып келе жатқанын атап өтті.
– Ресей Федерациясымен барлық бағытта тығыз байланыс орнаттық. Мемлекеттеріміз арасында ешқандай түйткіл жоқ. Тауар айналымын 30 миллиард долларға дейін арттыру міндеті қойылды, бұл қол жеткізуге болатын көрсеткіш, – деді Қасым-Жомарт Тоқаев.
Мемлекет басшысы әсіресе атом энергиясы және білім саласындағы ынтымақтастыққа ерекше назар аударды.
Оның айтуынша, "Росатоммен" бірлесіп атом электр стансасының құрылысын бастауға бағытталған маңызды келісімдерге қол қойылмақ.
Сондай-ақ, Ресейдің 9 жоғары оқу орны, соның ішінде жетекші университеттер Қазақстанда филиалдарын ашқанын атап өтті.
Ресей Президенті Владимир Путин де Қазақстанмен қарым-қатынастың жоғары деңгейде дамып келе жатқанын айтты.
– Қазақстан мен Ресей – жақын серіктес, достас әрі одақтас елдер. Бұл нақты істерден көрініс табуда. Ресей – Қазақстанның жетекші сауда-экономикалық серіктестерінің бірі және басты инвесторлар қатарында. Былтыр екі ел арасындағы сауда айналымы 27 миллиард доллардан асты, биылғы 9 айда бұл көрсеткіш 20 миллиард долларға жетті, – деді Владимир Путин.
Келіссөз қорытындысында тараптар өзара ынтымақтастықты жаңа деңгейге көтеруге бағытталған бірқатар құжаттарға қол қоюға ниетті екендерін растады.
Қасым-Жомарт Тоқаев Владимир Путинді Қазақстанға мемлекеттік сапармен келуге шақырды.
