Испания алюминий қаптамаларын кәдеге жарату көрсеткіші бойынша Еуроодақта алдыңғы қатарға шықты.
Өткен жылы елде 80 мың тоннадан астам металл қалдықтары өңделген. Бұл пайдаланылған қаптамалардың жартысынан көбі қайта өңделді деген сөз. Алдағы бес жылда Испания үкіметі өңдеу үлесін алпыс пайызға жеткізуді және қалдықсыз өндіріс технологияларын кеңінен енгізуді жоспарлап отыр.
2024 жылы Испанияда барлық қаптамаларды қоса есептегенде шамамен бір миллион бес жүз алпыс мың тоннадан астам қалдық өңделді. Оның ішінде алюминий ыдыстарының үлесі 80 мың тоннадан асты, бұл — өңделген материалдардың 5% шамасында.
Алюминий қаптамалары дегенде негізінен консерві қаптамалары, сусын және азық-түлік контейнерлері, кейбір косметикалық және тұрмыстық өнімдердің қорапшалары кіреді. Бұл қалдықтар Испанияда арнайы сары контейнерлерде сұрыпталып, ары қарай қайта өңдеу зауыттарына жөнелтіледі.
Клементе Гонсалес Солер, Испания алюминий өндірушілер қауымдастығының басшысы:
- Испаниядағы алюминий қаптамаларын қайта өңдеу көрсеткіштері артты, өйткені жылдар бойы экологиялық мәдениет қалыптасты. Бұл үрдіс бизнес пен қоғамның жауапкершілігін көрсетті. Сонымен қатар заңнамалық шаралар қатаңдады. 2025 жылдың 1 қаңтарынан бастап Испанияда барлық үй шаруашылығына арналған қаптамаларды белгілеу Патшалық жарлықпен міндеттелді. Әрбір қаптамаға тиісті белгі қойылуы тиіс, бұл тұтынушыларға қалдықтарды сұрыптауға көмектеседі.
Испаниядағы алюминий қалдықтарын өңдеу саласына инвестициялар да айтарлықтай өскен. 2024 жылы Пиреней түбегінде жаңа зауыттар құрылып, жылына жүз мың тоннадан астам алюминийді қайта өңдеуге мүмкіндік туды. Инвестицияның арқасында қаптамаларды қайта өңделу үлесі едәуір артып, өңделген металлдың сапасы жақсарып, энергия шығыны азайған. Жаңа зауыттар қалдықтарды сұрыптау мен балқыту процестерін автоматтандыру арқылы өндірістің тиімділігін арттырған.
Микель Ровира, ғалым:
- Алюминийді жаңадан жасау үшін өте көп электр энергиясы керек. Мысалы, бір тонна өндіру үшін шамамен сағатына 16 000 кВт энергия жұмсалады. Ал қайта өңделген алюминийді балқыту үшін кететін шығы осы энергияның шамамен 5% ғана. Яғни қайта өңдеу энергияны үнемдеп, өндіріс шығындарын азайтатыны анық. Алдағы бес жылда Испания үкіметі өңдеу үлесін алпыс пайызға жеткізуді және қалдықсыз өндіріс технологияларын кеңінен енгізуді жоспарлап отыр.
Испаниядағы алюминий қалдықтарын қайта өңдеу саласы қарқынды дамып келе жатқанымен, жалпы қалдықтарды сұрыптау ісінде кемшіліктер көп. Эко ұйымдардың мәліметінше, тұрмыстық қалдықтар мен пластик бұйымдарды сұрыптау деңгейі әлі де төмен. Кейбір аймақтарда жинақталған қалдықтардың жартысына жуығы ғана қайта өңдеуге жіберіліп, қалғаны полигондарға жөнелтіліп жатыр. Осыған байланысты инфрақұрылымды жаңарту, азаматтарды сұрыптауға ынталандыру және қалдықтарды дұрыс басқаруға қатысты салықтық шараларды күшейту қажеттілігі туындап отыр,-дейді мамандар.
Авторлары: Аида Қыдырбай, Дмитрий Рогач
