25 қазан – Республика күні қарсаңында және қала күні мерекесіне орай Түркістан қаласында әлеуметтік маңызы бар азық-түлік тауарларының жәрмеңкесі өтті.
Іс-шараға Түркістан қаласының әкімі Әзімбек Пазылбекұлы қатысып, тұрғындармен тілдесті. Қала әкімі жәрмеңке барысында өнімдердің сапасы мен бағасына назар аударып, қала халқымен пікір алмасты.
Жәрмеңкеге қала мен облыс аумағындағы ауыл шаруашылығы тауар өндірушілері қатысып, тұрғындарға бірнеше тонна сапалы әрі экологиялық таза өнімдерін ұсынды.
Сауда сөрелерінде ұн, күріш, макарон, көкөніс, ет және сүт өнімдері, жұмыртқа, май, қант секілді әлеуметтік маңызы бар тауарлар нарықтағы бағадан 30–50 пайыз төмен бағамен сатылды.
Жәрмеңке барысында қала тұрғындарына тиімді баға мен кең ассортимент ұсынылып, мерекелік көңіл-күй қалыптасты. Мәселен, сиыр еті – 2500 теңгеден, жылқы еті – 2800 теңгеден, ал жұмыртқаның данасы – 45 теңгеден сатылды.
