Қарағандыда Мемлекеттік тілдің мәртебесі асқақтады. Өңірде Қазақ тілінің қолданыс аясын кеңейту мақсатында бірқатар іс-шара қолға алынды.
Мәселен, облыс әкімдігі, «Қазақ тілі» халықаралық қоғамы және Қазтұтынуодағы Қарағанды университеті бірлесіп үш жақты ынтымақтастық туралы меморандумға қол қойды.
Қазақ тілінің қолданыс аясын кеңейтуді көздеген құжат бірлескен жобаларға жол ашты. Қарағандыда алғаш рет облыстық «Тұлпар мініп, ту алған!» байқауы өткізілетін болды.
Әлібек Әлденей, Қарағанды облысы әкімінің орынбасары:
- «Тұлпар мініп, ту алған» жобасы өздеріңіз білетіндей биыл тілдер күніне жарияланып, бүгінгі күні 13 өңірімізден 4 мыңға жуық бала қатысып отыр. Бұл жоба аясында біз қатысып отырған балалардың мемлекеттік тілге деген сүйіспеншілігін жалпы тілдік корпустағы тіл байлығын кеңейтуге бағытталса, екінші жағынан бұл жас ұрпақтың арасында патриоттық сезімді оятуға Қазақстанның тарихын білуге арналған жоба.
Бәсекелі байқауда 6-10 сынып оқушылары бақ сынайды. Әрі Тастыбай Жағыпарұлы жыраудың «Бөгенбай батыр» жырын жатқа оқиды. Оған облыстың 324 мектебінен 4138 оқушы қатысып отыр.
Рауан Кенжеханұлы, «Қазақ тілі» халықаралық қоғамының президенті
- Біздің ойымызша, мектеп қабырғасында, балабақшадағы, басқа оқу орындарындағы қазақ тілін оқыту дәстүрі, әдістемесі жетілмей біз мемлекеттік тілді тиісті тұғырына шығару мәселесінде көп ілгері жылжи алмаймыз. Сондықтан да осы «Тұлпар мініп, ту алған» деген әдемі атпен басталған бастаманың аясында мектеп оқушыларын соған баулып, тәрбиелеп, жаттықтырып жатқан мұғалімдерді, ұстаздарды қолдау біз үшін маңызды.
Меморандум аясында Қазтұтынуодағы Қарағанды университеті байқау жеңімпазына оқу грантын ұсынады. Ал оның ұстазына — «Қазақ тілі» халықаралық қоғамы атынан автокөлік сыйлауды көздеп отыр.
Алмас Орынбеков, Қазтұтыну одағы Қарағанды университетінің проректоры:
- Мемлекеттік тіл саясатын дамытуда, оны жүзеге асыруда бірқатар іс-шаралар өткізіліп жатыр. Университетімізде 30 жылдан астам жұмыс істеп келе жатқан Қазақ тілі және Қазақстан мәдениеті кафедрасы бар. Жаңағы аталған байқау «Тұлпар мініп, ту алған» ректор қолдады, жеңімпаздарға міндетті түрде грант беретін боламыз. Болашақта да осындай іс –шараларды қолдайтын боламыз. Енді осы қойылайын деп отырған меморандум әрі қарай да осы бағыттағы жұмыстарды жетілдіреді деген сенімдеміз.
Жиында қазақ тілін дамытумен қатар жастарды рухани құндылықтарға баулу мәселесі де сөз болды. Облыс әкімінің орынбасары, мемлекеттік тілдің беделін арттыру үшін алдағы уақытта да үзбей жұмыс жүргізетінін айтты. Демек меморандум бойынша бірлескен жобалар жалғасын табады.
