Алматы әкімі Дархан Сатыбалды Әуезов пен Медеу аудандарының әкімдеріне қатаң сөгіс жариялады, — деп хабарлайды Massaget.kz тілшісі.
Қызметтік тергеу
Дархан Сатыбалды Әуезов ауданында Аманжол және Яссауи көшелеріндегі тасжолдың шөгуі, Ерменсай шағынауданында траншеялар шайылуы, сондай-ақ, Бостандық ауданындағы Үлкен Алматы өзені жағалауынан гранит плиталар ұрлануы бойынша қызметтік тергеу жүргізуді тапсырды. Қала әкімі Полиция департаменті бастығына Үлкен Алматы жағалауынан гранит плиталар ұрлануына қатысты тергеу нәтижелері бойынша есеп беруді де тапсырды.
Сонымен қатар, Уәлиханов бульварындағы жиектасты заңсыз алып, плиталарды облыстағы жеке үйге жеткізген оқиға қоғамда үлкен наразылық туғызды. Бұл дерек бойынша да қылмыстық іс қозғалды.
Кімдер жазаланды?
Әуезов ауданы бойынша
Жуырда нөсер жауын кезінде Аманжол көшесінде жол төсемі шөгіп, 13 көлікке зақым келді. Сондай-ақ, Яссауи көшесінде асфальт опырылды. Осыған байланысты Әуезов ауданы әкіміне қатаң сөгіс жарияланды.
Бостандық ауданы бойынша
Ерменсай шағынауданында инженерлік коммуникациялар тарту үшін қазылған траншеяларды қатты су ағыны шайып, көліктердің қозғалысына кедергі келтірді. Сондай-ақ, әл-Фараби даңғылы мен Жароков көшесіндегі жерасты өткелінде гранит плиталарды негізсіз ауыстыру жұмыстарына бақылау болмауына байланысты Бостандық ауданы әкімі жоқ болғандықтан, оның тұрғын үй-коммуналдық шаруашылығы және абаттандыру саласына жетекшілік ететін орынбасары қызметінен босатылды.
Медеу ауданы бойынша
Мердігер ұйымды бақылауда кемшілік жібергені үшін Медеу ауданы әкіміне де қатаң сөгіс жарияланды.
Сонымен қатар, қала басшысы Үлкен Алматы өзенінің арнасын қайта жаңғырту және іргелес аумақты абаттандыру жобасын орындап жатқан "Павлодар өзен порты" АҚ мердігер ұйымының жұмысындағы кемшіліктерге қызметтік тексеріс жүргізуді және оның себебін анықтауды тапсырды. Жобаның тапсырыс берушісі ретінде Экология басқармасының басшысына сөгіс жарияланды.
Еске салайық, бұған дейін нөсер жауын Алматының астаң-кестеңін шығарғаны хабарланды.
Instagram парақшамызға жазылып, ең қызықты ақпараттарды бірінші болып оқыңыз!
