Қарағанды облысында «Келешек мектептері» ұлттық жобасы аясында 10 мектеп салу жоспарда бар. Бүгінгі таңда соның 5-уі пайдалануға берілді. Жаңа білім ошағының бірі Балқаш қаласында ашылды. Бұл қаладағы мектеп жетіспеушілігі мәселесін шешіп, балалардың сапалы білім алуына мүмкіндік береді. Жаңа мектепте заманауи технологияларды меңгеруге жан-жақты жағдай жасалған.
Балқашта ашылған мектеп 900 оқушыға арналған. Білім ошағының пайдалануға берілуі қаладағы бірнеше мектептегі орын тапшылығын шешіп отыр. Мұнда қазір 830 бала оқиды. Осындай замануи білім ордасын салып бергеніне ата-аналар дән риза.
Орынбасар Кәмелқызы, Балқаш қаласының тұрғыны:
- Немеремді әкеліп жүрмін. Немерем бұрын №4 мектепке қашықтан барды. Қазір міне, өзіміздің №10 шағын ауданында жаңа мектеп ашылды. Өте жайлы, заманауи құралдарының барлығы бар.
Мектепте жиын залы, 2 денешынықтыру залы, кітапханасы, пәндік сабақтар бойынша STEM зертханалары, робототехника кабинеті бар. Келешекте мұнда балалар жасанды иттеллект пен цифрлық технологияны меңгереді. Ол үшін ұстаздар арнайы біліктілікті арттыру курстарына жіберіледі.
Қарлығаш Дүбірбекова, Балқаш қаласы Білім бөлімінің басшысы:
- Бүгінгі заманауи технология шапшаң қарқынмен дамып бара жатыр. Сондықтан жасанды интеллект, жаңағы сандық технология бойынша педагогтар керек. Қазір біздің жаңа мектептің жабдықтарының өзі өзге мектептерден ерекше фишкалары бар. Мысалы, нирой кабинеті, физика кабинетінің айырмашылығы бар. STEM зертханалары, робототехника, жаңағы балалрды болашақта дрондармен жұмыс істеуге үйрету үшін педагогтарды дайындауымыз керек.
Қарағанды облысында «Келешек мектептері» ұлттық жобасымен 10 мектеп салу жоспарланған. Жаңа білім ошақтары әр жерде кезең-кезеңімен ашылып жатыр. Бүгінгі таңда 5-уі пайдалануға берілді. Қалғанының құрылысы Президент тапсырмасына сәйкес жыл соңына дейін аяқталуы керек. Облыс бойынша 420 мектеп бар. Оларда 175 мыңнан астам оқушы білім алады.
Авторлары: Руслан Нұрланұлы, Сайран Ақамбаев, Аман Хамит
