Қазақ балуандары әлем чемпионатына дайындалып жатыр .

Осы жылдың басты белдесулері — Хорватияның астанасы Загреб қаласында өтеді. Дүбірлі додада грек-рим, еркін күрес және әйелдер күресінен жүлделер сарапқа салынады. Соңғы дайындық кезеңі Алматы облысында өтіп жатыр.

Ересектер арасындағы Әлем чемпионаты қыркүйектің 13 мен 21-і аралығында өтеді. Еліміздің намысын 3 бағыт бойынша 30 балуан қорғайды. Еркін күрес шеберлерінің дайындығы алдымен Грузиядағы оқу-жаттығу жиынынан басталып, кейін өз жерімізде жалғасты.

Дәулет Тұрлыханов, Грек-рим, еркін және әйелдер күресі федерациясының президенті:

- Әлем чемпионатына дайындықты тәмамдап, палуандарымызды баптап, бәйгеге шабатын ат секілді әкеліп жатырмыз. Өйткені палуандарымыз барлық жағынан мықты болу керек.

Ұлттық құрама сапына елдің ең таңдаулы балуандары енген. Олардың қатарында әлемдік және құрлықтық біріншіліктерде жүлде алған тәжірибелі спортшылар да бар. Ал команданың әр қадамын қадағалап, жауапкершілікті еңсеріп жүрген — бас бапкер. Ол балуандардың физикалық дайындығын да, психологиялық төзімін де жіті бақылайды.

Мадияр Құрамыс, Еркін күрестен ұлттық құраманың бас бапкері:

- Біздің дайындық 3 кезеңнен тұрды. Бірінші кезеңде тауда жаттығу өткіздік. Физикалық тұрғыда дайындалды. Содан кейін Грузияға барып, бірлескен оқу-жаттығу жиыны өтті. 11 күні әлем чемпионатына аттанамыз.

Әлемдік додаға тек тәжірибе жеткіліксіз. Мұнда мінез бен төзім қатар сыналады. Жас та болса, жігерлі балуанның бірі — Ризабек Айтмұхан. Ол екі жыл бұрын Сербияда 92 келі салмақта топ жарып еркін күрестен Әлем чемпионатын ұтқан тұңғыш қазақ атанып еді. Ал биыл 21 жастағы спортшы Загреб бозкілемінде олимпиадалық 97 келі салмақта шығады.

Ризабек Айтмұхан, еркін күрестен әлем чемпионы:

- 100 пайыз дайынмын. Алтын күтемін. Дайындығым өте жоғары деп айтуға болады. Өйткені Ресейде, Грузияда оқу-жаттығу жиындарын өттім. Өте мықты қарсыластар болды. Солармен тәжірибе алмасып, Әлем чемпионатына осындай мықты жоғары деңгейде дайындықпен келдік.

Загреб төрінде Иран, Ресей, АҚШ, Жапония сынды алыптардың балуандары кілемге шығады. Грек-рим және әйелдер күресінен ұлттық құраманың мүшелері де тыңғылықты дайындалуда. Спортшылар 11 қыркүйекте Хорватияға аттанады.

Авторлары: Алуа Ералықызы, Әлия Феликсқызы, Әбен Нарымбаев