Алдағы күндері мегаполистің мәдени өміріндегі ең айшықты оқиғалардың бірі – «Almaty Museum of Arts» мұражайының ашылуы болмақ. Қалаға келген туристер табалдырығын аттамай кетпейді деп болжанып отырған, орасан қаржы салынған алып музейдің дақпырты әлден-ақ естіліп жатыр.
Дәл осы күндері жаңа туристік нысанның алдында Алматы үшін арнайы жасалған әйгілі суретші Йинки Шонибаренің мүсіні пайда болды. Бұған дейін биыл музей алдына салтанатты түрде қойылған Жауме Пленсаның «Надэс» мүсіні жұрттың айтарлықтай қызығушылығы мен пікірталасын тудырғанын білеміз.
Британ-нигериялық Йинка Шонибаренің өзіне келсек, ол отаршылдық пен болмыс тақырыптарын зерттейтін қазіргі заманның ең танымал суретшілерінің бірі. Оның туындылары әлемнің әйгілі мұражайларында, атап айтқанда Чикагодағы «Art Institute of Chicago», Лондондағы «British Museum», Париждегі «Centre Pompidou», Вашингтондағы «Hirshhorn Museum», Нью-Йорктегі «MoMA», Сан-Францискодағы «San Francisco Museum of Modern Art», Лондондағы «Tate», Кейптаундағы «Zeitz MOCAA» мен басқа да мұражайларда тұр.
«Almaty Museum of Arts» мұражайының басты кіреберісіне қойылған Йинка Шонибаренің мүсіні ғасырлар бойы Атлант мұхиты арқылы құлдарды тасымалдаған желкенді кемелерді де еске салады. Осылайша, «жоқтан бар жасауды» мұрат тұтқан мүсінші желдің өзін қағазға түсіргісі келеді. Суретші өз шеберханасында мата мен шаш кептіргіш арқылы эксперимент жасап, ауаның лебі матаға соққанда пайда болатын пішіндерді суретке түсірген. Алматыда қалатын туынды ауыр алюминийден жасалғанына қарамастан, мүсін жеңіл әрі ауада қалқып тұрғандай әсер қалдырады.
Орайы келіп тұрғанда, «Almaty Museum of Arts» жобасына тоқталатын болсақ, жаңа музейдің іргетасының қалануына танымал кәсіпкер, меценат әрі отандық коллекционер Нұрлан Смағұлов қоры мұрындық болып отырғаны белгілі. Музейге меценаттың соңғы отыз жыл бойы жинаған 700-ден астам туындыдан тұратын сурет жәдігерлері қойылады. Оның ішінде Қазақстан мен Орталық Азияның, сондай-ақ атағы жер жарған әлемдік суретшілердің картиналары бар.
АЛМАТЫ
