Шымкент қаласы әкімінің бірінші орынбасары болып Айдын Кәрімов тағайындалды. Сондай-ақ қала әкімінің орынбасары лауазымына Арман Сәбитов тағайындалды, деп хабарлайды әкімдіктің баспасөз қызметіне сілтеме жасаған KAZ.NUR.KZ.
"Қазақстан Республикасы президенті әкімшілігінің келісімімен және қала әкімінің өкімімен Шымкент қаласы әкімінің бірінші орынбасары лауазымына Айдын Мейрамбекұлы Кәрімов тағайындалды", — делінген хабарламада.
Айдын Мейрамбекұлы 1988 жылғы 1 қаңтарда Семей қаласында дүниеге келген. Л.Н.Гумилев атындағы Еуразия ұлттық университетін, Қазақ қаржы-экономикалық академиясын және Қазақ гуманитарлық заң университетін бітірген.
Еңбек жолын 2006 жылы Төтенше жағдайлар министрлігінің "Есеп техникасы, телекоммуникация, информатика және жағдайлық талдау орталығында" желілік техника қызмет көрсету бөлімінің жетекші маманы болып бастаған.
2007-2016 жылдары Астана қаласы әкімі аппаратының бөлім басшысы, Семей қаласы әкімінің көмекшісі, Экономикалық даму және сауда министрлігінде бас сарапшы, Экономика және бюджеттік жоспарлау министрлігінде басқарма басшысы, Халықаралық экономикалық интеграция департаменті директорының орынбасары болған. Сондай-ақ "Ұлттық ақпараттық технологиялар" акционерлік қоғамында жұмыс істеген.
2016-2017 жылдары Премьер-министр кеңсесінің Сыртқы байланыстар және протокол бөлімінің меңгерушісі, Премьер-министр протоколының бастығы, 2019-2022 жылдары Премьер-министр кеңсесі басшысының орынбасары, 2022-2023 жылдары Абай облысы әкімінің бірінші орынбасары қызметтерін атқарған.
2023 жылғы қыркүйек айынан бастап осы күнге дейін Шымкент қаласы әкімінің орынбасары болған.
Айта кетейік, бұған дейін Шымкент қаласы әкімінің бірінші орынбасары болған Қуаныш Жұмабекұлы Асылов басқа жұмысқа ауысуына байланысты қызметінен босатылған.
Сондай-ақ Президент әкімшілігінің келісімімен және қала әкімінің өкіміне сәйкес, Шымкент қаласы әкімінің орынбасары лауазымына Арман Сәбитұлы Сәбитов тағайындалған.
Арман Сәбитұлы 1984 жылғы 20 сәуiрде Шымкент қаласында дүниеге келген.
Әл-Фараби атындағы Қазақ Ұлттық университетін және Қазтұтыну одағы Қарағанды экономикалық университетін бітірген.
Еңбек жолын 2004 жылы Алматы қаласындағы "Азаматаудит" ЖШС аудиторының ассистенті болып бастаған.
2008-2012 жылдары жеке секторда басшылық қызметтер атқарған.
2011-2016 жылдары – Алматы қаласы бойынша Тексеру комиссиясының мүшесі.
2016-2017 жылдары – Оңтүстік Қазақстан облысы әкімі аппараты басшысының орынбасары.
2017-2018 жылдары – Оңтүстік Қазақстан облысының экономика және бюджеттік жоспарлау басқармасының басшысы.
2018-2019 жылдары – Түркістан облысының экономика және бюджеттік жоспарлау басқармасының басшысы.
2019-2020 жылдары – Президент әкімшілігінің мемлекеттік инспекторы.
2020-2023 жылдары Түркістан облысы әкімінің орынбасары болған.
2023 жылдың маусым айынан бастап 2025 жылдың 7 тамызына дейін Түркістан облысы Сайрам ауданының әкімі қызметін атқарған.
Мәтіннен қате тапсаңыз, бізге жазыңыз
