Астанада Ахмет Ташомджудың шеберлік сабағы басталды, деп хабарлайды 24kz.

Түркиядан арнайы келген қыш шебері бір апта бойы қатысушыларға білгенін үйретеді. «Айырықша өнер иесі өрнектелген қыш бұйымдар арқылы түбі бір түркі жұртының тарихын әлемге таныту – мақсатым», — дейді.

Альмира Оразбай, тілші:

- Ахмет Ташомджудың қыш пен керамиканы жанына серік еткеніне 45 жылдан асты. Тәжірибелі ісмердің сабағына тек көршілес емес, тіпті америкалықтар да арнайы барып қатысады. Биыл сәті түсіп, ол елордаға ат басын тіреді. «Бұл өнермен айналысу үшін көздің қырағылығы, қолдың ептілігі мен аса ыждағаттылық керек», - дейді Ахмет ұста.

Ахмет Ташомджу, қыш шебері:

- Мәселен Түркия мен Италияда бұл өнер дамыған. Ал Қазақстанда енді ғана өркендеп келе жатыр. Қыш және керамикамен жұмыс істеуге, әсіресе, жастардың қызығушылығы артқаны қуантады. Астанаға жергілікті ісмердің арнайы шақыртуымен келдім. Бүгін шеберлік сабағыма қатысқан әрбір азаматқа бар білгенімді бөлісемін.

Ахмет Ташомджу қыш құмыра жасаудан әлем чемпионы. Ол 2011 жылы 6 метрге жуықтайтын құмыра жасағаны үшін Гиннестің рекордтар кітабына енген. Мұндай халықаралық деңгейдегі ұстаның сабағына бүгін тек қазақстандық емес, өзге де мемлекеттердің шеберлері қатысып жатыр.

Джахан Намазова, қыш шебері:

- Мен Әзербайжаннан арнайы келіп отырмын. Ахмет Ташомджудың Қазақстанға келетінін әлеуметтік желі арқылы білдім. Әрине, ойланбастан Астанаға билет алып, бірден ұшып келдім.

Анастасия Костова, қыш шебері:

- Әлемдік деңгейдегі шеберден сабақ алу мен үшін арнайы Қырғызстаннан келіп отырмын. Осыдан 1,5 жыл бұрын дәл осы Ахмет ұстаның жеке сабағына қатыссам деген арманым болды. Міне, бүгін армандардың орындалатынына көзім жетті.

Қазір елде қыштан түрлі бұйым жасап, сүйікті ісін кәсіпке айналдырған азаматтардың қарасы қалыңдады. Ерекше өрнектелген бұйымдарға сұраныс та артып жатыр.

Қарлығаш Оралбаева, қыш шебері:

- Сайыстарда Қазақстанның атынан, әйелдердің атынан қатысамын. Сол сайыстардың ішінде Франциядан үшінші орын алғанмын. Қыш құмыра өнері өте қатты дамуда. Күннен күнге осы қышқа қызығатын адамдар көбеюде. Мемлекет тарапынан, Атамекеннен қолдау болды. Алдағы уақытта грант ұтып аламын деген үміттемін.

Бүгінде жеке студиясын ашып, шәкірт тірбиелеймін дегендерге жол ашық. «Ол үшін тіпті арнайы мемлекеттік бағдарламалар да қарастырылған», - дейді мамандар.

Авторлары: Альмира Оразбай, Арман Ақшабаев