Алматыда орналасқан №1 облыстық балалар үйіне қатысты дау жалғасын тапты . Мәжіліс депутаты Бақытжан Базарбек Алматы облысы Білім басқармасының мекемені Қонаевқа көшіру туралы бұйрығын жариялады, — деп хабарлайды Massaget.kz тілшісі.
Бұған дейін не болды?
2025 жылы наурызда №1 облыстық балалар үйінің тәрбиеленушілері мекеме Алматыдан Қонаев қаласына көшіріліп жатқанына шағымданды. Олардың үндеуі әлеуметтік желілерде пайда болды.
Кейінірек Алматы облысының әкімі Марат Сұлтанғазиев Алматы қаласындағы №1 балалар үйінің тәрбиеленушілерімен кездескен болатын.
"Біздің мақсатымыз — балалар өзін қауіпсіз сезініп, жан-жақты дамуы үшін қолайлы орта қалыптастыру. №1 балалар үйінің тәрбиеленушілері Алматыда қалады, ал жаңадан келетін балалар Қонаев қаласындағы заманауи кешенге орналастырылады", — деді бұған дейін өңір әкімі Марат Сұлтанғазиев.
Депутат не дейді?
Алайда Мәжіліс депутаты Бақытжан Базарбек әлеуметтік желіде Алматы облысы Білім басқармасының 2025 жылғы 10 шілдедегі "Арнаулы әлеуметтік қызметтерге мұқтаж балаларды қолдаудың облыстық орталығы" КММ-нің орналасқан жерін өзгерту туралы" бұйрығын жариялады.
"Бұл не? Балаларға тиіспеймін деп уәде бердіңіз ғой! Алматы облысының шенеуніктері Алматы қаласы Бостандық ауданы Бағанашылдағы балалар үйінің балалары көшірілмейтінін айтқанына үш ай да өткен жоқ... Бұл бұйрық нені білдіреді? Ресми түсініктеме күтемін", — деп жазды Бақытжан Базарбек.
Аптаның басты оқиғалары мен пайдалы видеоларды көру үшін YouTube арнамызға жазылыңыз
