Шығыстағы Бұқтырма су қоймасының жағасындағы бұрын жекенің иелігіндегі электр желілері мемлекет меншігіне өтті. Ол үшін облыстық бюджеттен былтыр 110 миллион теңге бөлінді. Нәтижесінде туристік нысандарға үздіксіз энергия беріліп, тарифті төмендетуге мүмкіндік туды. Оған қоса жағажайда ұялы байланыс мәселесі де шешімін таппақ. Бұл Самар ауданында туризмнің дамуына септігін тигізеді. Жоспар бойынша биыл шілде айына дейін жағалаудағы туристік нысандар толықтай интернетке қосылады. Оған ұялы байланыс операторлары өз қаражатын салуға дайын. Инфрақұрылым толық тартылған соң Бұқтырманың жағасындағы туристік нысандар жыл он екі ай жұмыс істейтін болады. Ал былтыр жалпы шығысқа 600 мыңға жуық турист келген.
Серік Жеңісов, Самар ауданының әкімі:
Бұл жерде біз демалатын орындардың қасына ирригациялық орталықтар жасауымыз керек деп отырмыз. Бұл дегеніміз адамдар келген кезде спортпен айналысатын, йогамен айналысатын және балалармен қыдыратын, дәмханалар, мейрамханалар осы туристік нысандардың жанында болуы керек.
Олжас Керейхан
