Ақтөбенің 64 жастағы тұрғыны 1986 жылғы Желтоқсан оқиғасына байланысты саяси қуғын-сүргін құрбаны болғанын сотта дәлелдеді, — деп хабарлайды Massaget.kz тілшісі.
Іс материалдарына сүйенсек, Ақтөбе тұрғыны 1984 жылы Гурьев облыстық партия комитеті мен Мақат локомотив депосы кәсіподақ комитетінің жолдамасымен Қазақ мемлекеттік университетінің дайындық бөліміне оқуға түседі. 1985 жылы осы университеттің философия және экономика факультетінің студенті атанған.
Алайда оны 1986 жылы қоғамдық тәртіпті бұзды деген айыппен университеттің екінші курсынан оқудан шығарған. Оның оқудан шығарылуына 1986 жылы 18 желтоқсанда Желтоқсан оқиғасына қатысты деген күдікпен құқық қорғау органдары қызметкерлерінің ұстауы себеп болған.
Кейін босатылғанымен студент КОКП қатарынан шығарылып, қуғын-сүргінге ұшырап, жұмысқа тұра алмаған. Сол университеттің философия факультетін бітірген оның әйелі де осындай себептермен жұмысқа орналаса алмай, түрлі кедергілерге тап болған.
1990–1993 жылдары үш кішкентай баласы бар отбасы баспананы жалға алуға мәжбүр болған және әлеуметтік жағынан осал жағдайға тап болған.
2025 жылы 64 жастағы азамат 1986 жылғы Алматыдағы Желтоқсан оқиғасына қатысуына байланысты саяси қуғын-сүргін дерегін тану туралы сотқа жүгінген.
"Ақтөбе қалалық №3 соты істі зерттей келе, арызданушы, шынымен де, 1986 жылғы Желтоқсан оқиғасына қатысқанын және саяси қудалауға, оның ішінде еңбек құқығын шектеуге ұшырағанын анықтаған. Бұл мән-жайлар университет пен Алматы қалалық прокуратурасының архив анықтамаларымен, сондай-ақ, куәлердің айғақтарымен расталған", — деп жазылған хабарламада.
Сот талап қоюшыны 1986 жылғы оқиғаға байланысты саяси қуғын-сүргін құрбаны деп таныды.
Соттың шешімі заңды күшіне енді.
Саяси қуғын-сүргін құрбаны мәртебесі туралы
Қазақстанда "Жаппай саяси қуғын-сүргін құрбандарын ақтау туралы" заң 1993 жылдан бастап қолданыста.
2023 жылдан бастап саяси қуғын-сүргінге ұшыраған адамдарға біржолғы өтемақы мен ай сайынғы жәрдемақы төленеді. Сондай-ақ, мұндай адамдар әлеуметтік қызметтерді көрсету кезінде басымдыққа ие.
Аптаның басты оқиғалары мен пайдалы видеоларды көру үшін YouTube арнамызға жазылыңыз
