Елордада JоІtap жобасы бойынша 12 мыңға жуық адам тегін кәсіби білім алды, деп хабарлайды 24kz.
Оның ішінде маркетинг, дизайн, сауда және қызмет көрсету салалары бар. Биыл жұмысшы мамандықтары жылы аясында тағы бір мамандық түрі қосылды.
Еркебұлан Смадияров, тілші:
- Айдос таргетолог қызметін атқарып жүр. Бизнес саласында бұл мамандыққа сұраныс жоғары. Өз кезегінде бәсекелестік те артып келеді. Сондықтан қызмет сапасын одан әрі жақсарту үшін JоІtap жобасы арқылы графикалық дизайн ісін қоса меңгеруді ұйғарған.
Айдос Молгаждаров, қала тұрғыны:
- JоІtap жобасына келгеніме 15 күн өтті. Бүгін аяқталу күні болып жатыр. Таргетте осы мамандықты одан сайын дамытып, өзімнің кәсібімді одан әрі дамыту мақсатында келдім. Жасанды интеллект қазіргі таңда өте қарқынды дамып келе жатыр. Соны осы сабақта меңгере аламыз.
Дәулет Аждар, графикалық дизайн курсының оқытушысы:
- Студенттер әлеуметтік желілерге түрлі дизайн жасауды үйренеді, кәсіпкерлерге логотип жасауды үйренеді, брендинг жасауды үйренеді. Одан бөлек, түрлі жарнамалық материалдардың дизайнын жасауды практикалық түрде үйренеді.
Ал Гулфайруз тігін курсына жазылған. Оның негізгі мамандығы педагог болғанымен, қосымша табыс көзін ашуды қалайды. Айтуынша, мұнда қарапайым киім-кешекпен қатар өндіріс орындарына қажетті арнайы киімдер тігуді меңгеріп алған.
Гүлфайруз Еркінбайқызы, қала тұрғыны:
- Біз тігістің барлық түрін үйрендік және міне, халаттың түрін бүгін ғана тігіп бітірдім. Дәрігерлер киетін немесе арнайы формалар. Бірақ осының аясында біз басқа да киімдерді тігуді, барлық киімнің тігістерін үйрендік. Мысалы, бір халаттың арқасында жейденің жағасын тіге аламыз, жеңін, қалтасын тіге аламыз.
Жобаны қала әкімдігінің бастамасымен «Жаңа мүмкіндік» қоғамдық қоры жүзеге асырып жатыр. Тұрғындарға тегін 19 курс ұсынылады. Оның жетеуі цифрлық, қалғаны жұмысшы мамандықтарына қатысты. Биыл бұл тізімге полимерлі ұнтақпен бояу мамандығы қосылып отыр.
Ерасыл Ділдәим, Joltap жобасының менеджері:
- Бизнес өкілдерімен бізде айрықша келісімдер бар. Солардың арасында практиканы осы адамдар зауыт, кешендерде өтеді. Мысалы, жиһаз жинау теориясын осы жерде өтеді де, жұмыс істеп жатқан цехтың базасында толығымен практика өтіледі. Дәл солай дәнекерлеуші, полимерлі бояу мамандығы, май ауыстыру сияқты мамандықтар.
Мамандардың мәліметі бойынша екі жылға жуық уақыт ішінде 12 мыңдай адам курсқа қатысқан. Оның 70%-і жұмыспен қамтылып отыр. Мыңнан астамы жеке кәсібін ашып үлгерген.
Авторлары: Еркебұлан Смадияров, Мерей Талап, Ғалымжан Әбділахат
