Ақмола облысында кадастрлық құны 567 миллион теңге болатын жер телімі кәсіпкерге заңсыз берілген. Бұл туралы өңірлік прокуратура хабарлады, деп хабарлайды Skifnews.kz ақпарат порталы.
Жер қатынастары бөлімі 36 гектар аумақты заңсыз түрде жеке тұлғаға коммерциялық орман өсіру үшін берген. Алайда бұл жер рекреациялық аймаққа жатады және тек қана қазақстандықтардың демалысы мен сауықтыруына арналуы тиіс.
«Жер ресурстарын басқару департаменті сотқа жүгінді. Мамандандырылған ауданаралық экономикалық соттың шешімімен жалға беру туралы шарт жарамсыз деп танылып, жер телімі қайтадан рекреациялық мақсаттағы жерлер қатарына енгізілді», – деп хабарлады прокуратура өкілдері.
Қабылданған шаралардан кейін Щучинск қаласында рекреациялық аймақтағы жерлердің құқықтық мәртебесі қалпына келтірілді.
