Қазақстанға керқұландардың жаңа тобы келді. Бұл — "Жабайы жылқылардың оралуы" жобасы аясындағы екінші іс-шара , — деп хабарлайды Massaget.kz тілшісі.
Жаңа керқұландар Прага зоопаркі мен мажар Hortobágy ұлттық паркінен әкелінді. 2 маусымда төрт жылқыдан тиелген екі әскери ұшақ Чехия мен Мажарстан елдерінен ұшып шықты.
"Жануарлар бір тәуліктей алыс жол асырды. 3 маусымда таң ата екі ұшақ Арқалық әуежайына қонып, жануарлар "Алтын Дала" мемлекеттік табиғи резерваты аумағына жеткізілді. Олар мұнда бір жыл ұсталады да, кейін жабайы табиғатқа жіберіледі", — деп жазылған хабарламада.
Суреттер: gov.kz
Айта кетейік, керқұлан (кертағы) — әлемдегі жабайы жылқылардың ақырғы түрі. Ол XX ғасырдың ортасына қарай жабайы табиғаттан құрып кетті. Бұған дейін 7 бас керқұлан Қазақстанға 2024 жылы маусымда әкелінді. Керқұландарды босататын жер ретінде Қостанай облысындағы "Алтын дала" мемлекеттік табиғи резерватының даласы таңдалды
Пржевальский жылқысы (Equus przewalskii Poljakov) 2021 жылы Қазақстандағы сирек кездесетін және жойылып кету қаупі төніп тұрған өсімдіктер мен жануарлар тізіміне енді.
Аптаның басты оқиғалары мен пайдалы видеоларды көру үшін YouTube арнамызға жазылыңыз
