Маңғыстау облысында былтыр мыңнан астам бозбала Отан алдындағы борышын өтеуге аттанған. Бұл жоспардағыдан артық- дейді жауаптылар.
Яғни жастар әскер қатарына өз еркімен баруға ынталы. Биыл көктемде 1438 жас шақырту қағазын алған. Көбі қорғаныс саласында қалып, әскери қызметті жалғастырғысы келеді. Оларды мемлекет тарапынан көрсетілетін қолдау шаралары да қызықтырады.
Аллақұл Орынбай былтыр күзде әскерге шақыртылды. Алматыдағы Ұлттық ұлан сапында жүріп көшедегі бұзақылық, есірткі саудасы сынды заңбұзушылықтардың алдын алуға атсалысты. Біраз қылмысты дер кезінде ашуға көмегі тиді. Өжет сарбаздың еңбегі елеусіз қалмады. Үлгілі перзент тәрбиелегені үшін оның анасы жауынгерлік бөлім басшылығының марапатына болды. Аллақұл енді туған ағасының ізін жалғап, әскери теңізші болғысы келеді.
Аллақұл Орынбай, Мұнайлы ауданының тұрғыны:
- Алматы қаласында кішкентай балалар жоғалып кеткен оқиғалар болды. Оларды табуға көмектесуге атсалыстық. Ұсақ бұзақылық болады, соның алдын алып ұстап, полиция қызметкерлеріне тапсырып, «Отан қорғаушының анасы» деген марапат алып келдім анама. Өзім сияқты жастарға айтарым Қазақстанды қорғаудан қашпау керек. Отан алдындағы борышын адал атқару керек.
Зұлбархыт Сүгірбаева, А.Орынбайдың анасы:
- Тәртіппен бірге білімді де алып келді сол әскерден. Өзіне қарап жинақы, киімдері таза, төсек-орнын өзі жинап, кешке жатарды аяқ киімін тазалайды. Бойынан сондай көптеген өзгерісті байқадым. Солдат болып қана емес үлкен азамат, жігіт болып әскерден оралды.
Маңғыстау жастарының іөбі елдегі бірегей теңіз жаяу әскерлері бригадасына, шекара жасағына баруға ниетті. Бұл ретте бозбаланың бойы мен салмағы талапқа сай келіп, психологиялық тесттен сүрінбей өтуі тиіс. Жері Каспиймен шектескен өңірде күзгі әскерге шақыру науқаны әлі де жалғасып жатыр.
Нұрбол Есенәлиев, облыстық Қорғаныс істері жөніндегі департаменттің бөлім бастығы:
- Күзгі мерзімде әскерге шақыру науқанына 816 шақырушыға тапсырыс берілген. 675 азаматты әскерге шығарып салдық. Алдағы уақытта желтоқсан айының аяғына дейін 141 азаматты Ұлттық ұлан әскерлеріне жіберу жоспарда тұр. Жылдан жылға азаматтарымыздың арасында әскери қызметке деген қызығушылықтың бар екені байқалады. Оның бірінші себебі деп ойлаймын – әскери пакет әскерде көп қарастырылған.
Мерзімді әскери қызмет атқарушылар мен саналы ғұмырын әскерге арнағандар үшін мемлекеттен қолдау бар. Айталық, төмен пайызбен берілетін ипотека. Әскерден оралған жас ҰБТ тапсырмай-ақ жоғары оқу орнына түсе алады. Егер банкке қарызы болса, несие төлемі 14 айға шегеріледі. Тұрақты жұмысы бар азамат армияда жүрген шағында қызмет орны сақталады. Биыл осы мүмкіндікті бірнеше маңғыстаулық жас пайдаланған.
Авторлары: Талғат Исламұлы, Саламат Бекбаев
