Каспий теңізіне форель шабақтары жіберіліп, ашық теңіз акваториясында балық өсіру жобасы іске қосылды.
«Organic Fish» серіктестігі алдағы уақытта теңіздегі ашық алаңда жылына 5 мың тоннаға дейін балық өсіруге ниетті. Аталған іс-шараға облыс әкімі Нұрдәулет Қилыбай қатысты. Сонымен бірге аймақ басшысы Маңғыстау энергетикалық комбинатының жүргізушілеріне 20 автобустың кілтін табыстады.
Балық фермасы биыл Маңғыстауда жүзеге асқан ірі жобаның бірі әрі бірегейі. Жағалауда диаметрі 120 метр, тереңдігі 25 метр болатын үш тор қоршама орнатылған. Өткен айда 30 мың, бұл жолы да осынша көлемде шабақ жіберіліп отыр. Аймақ әкімі инвестициялық жобаның өңірде азық-түлік қауіпсіздігін қамтамасыз етуде, импортты алмастырудағы үлесін жоғары бағалады. Мұнда келер жылы 300 тонна балық өндірілмек.
Нұржан Марабаев, «Semurg Invest» ЖШС бас директоры:
- Тор қоршамаларға жалпы салмағы 12 тонна болатын 60 мыңнан астам шабақ жіберілді. Теңіздің табиғи суы мен өңірдің жылы климаты форель тұқымдас балығын өсіруге мүмкіндік береді.
Арман Молдашев, Балық шаруашылығы басқармасының басшысы:
- 2025-2027 жылдар аралығында біздің өңірде 4 ірі балық өсіру жобасы бар. Каспий теңізінде тор қоршамада 5 мың тоннаға дейін балық өсіру жоспарланған жоба. Қазіргі таңда 2025 жылдың аяғына дейін 100 мың дана шабақ отырғызу жоспарлануда.
«МАЭК» кәсіпорнына 20 автобус берілді
Тәуелсіздік мерекесі қарсаңында «МАЭК» кәсіпорнының паркі 20 автобуспен толықты. Соңғы үлгідегі автобустар энергокомбинат қызметкерлерін қаладан кәсіпорынға және кері бағытта тасымалдайды.
Теңелбай Жұмағалиев, «МАЭК» мекемесінің қызметкері:
- Алдында мініп жүрген автобустарымыз ескі, ішінде ешқандай жағдай болған жоқ. Қазір енді жұмысшылар комфортабельді автобусқа мінгелі жатыр. Облыс әкіміне, МАЭК мекемесінің басшыларына үлкен рахмет айтамыз.
«МАЭК» — теңіз суын тұщытып, Ақтауды ауызсу, жылу және энергиямен қамтамасыз етеді. Үш мыңнан астам адам жұмыс істейтін мекеменің автопаркі алғаш рет толық жаңарды.
Авторлары: Талғат Исламұлы, Ренат Досалиев
