АҚШ-қа қыдырып, қонаққа баруға виза алу былай тұрсын, визасыз кіруге рұқсаты барларға да бақылау күшейеді.
Бұл елге Еуропа мен Азия елдерінен 40 мемлекеттің азаматтарына туризм немесе іскерлік мақсатпен үш айға дейін визасыз кіруге мүмкіндік бар.
Енді АҚШ-тың Кеден және шекара қызметі кейінгі 5 жыл ішінде пайдалынылған телефон номерлерінің тізімі, электронды пошта, электронды фотосуреттердің метадеректері, әлеуметтік желідегі деректер мен отбасы туралы толық ақпарат талап етуі мүмкін.
Бұған себеп не?
Әр елдің визалық саясаты әртүрлі
Әр мемлекет визалық саясатын өз геосаяси жағдайына, экономикасына және сыртқы саясатына қарай белгілейді. Әлемде түрлі мемлекет қалыптасып, өз территориясына орныққалы бері, визалық саясат күшейе түсті. ХХ ғасырдан бастап халықаралық көші-қон көлемінің артуы, азаматтардың қозғалысын бақылауға мәжбүр етті. Осыған байланысты визалар қауіпсіздік пен тәртіпті сақтаудың маңызды құралына айналды. Қазір қай елде қақтығыс болса, сол елдің азаматтарының шетелге шығуына біраз қиындық болады. Оларды ең әлсіз паспорт иелері деп таниды. Мұндай елдердің қатарына Ауғанстан, Сирия, Ирак, Пәкістан, Йемен сынды елдер кіреді.
Ал Сингапур азаматтары 193 елге визасыз кіре алады. Жапония, Оңтүстік Корея 190 елге, Франция, Германия, Италия, Испания секілді елдердің азаматтары 189 елге дейін арнайы құжатсыз бара алады. Канада, Ұлыбритания, Австралия сияқты елдер де 180 елге алаңсыз саяхаттай береді. Бұл сол елдің геосаяси және экономикалық тұрақтылығының көрсеткіші.
СИНГАПУР — 193 ел
ЖАПОНИЯ, ОҢТҮСТІК КОРЕЯ — 190 ел
ФРАНЦИЯ, ГЕРМАНИЯ, ИТАЛИЯ, ИСПАНИЯ — 189 ел
КАНАДА, ҰЛЫБРИТАНИЯ, АВСТРАЛИЯ — 180 ел
Қазіргі жаһандану ғасырында визалық режимді енгізу жүйесі өзгеріп жатыр. Бір елде визалық талаптар жеңілдеп, екінші бір елде керісінше бақылау күшейді. Оған электронды визалар мен биометриялық жүйелердің дамуы, аймақтық визалық одақтардың қалыптасуы, туризм мен инвестиция сияқты бірнеше фактор әсер етеді. Жалпы визалық режим халықаралық туризмге, еңбек көші-қонына, мемлекеттердің халықаралық беделіне, экономикалық және мәдени байланыстарға қарай әртүрлі қалыптасады. Алайда ең негізгі міндеті — әр елдің егемендігін сақтау, қауіпсіздігін қамтамасыз ету және халықаралық қатынастарды реттеудегі маңызды құралы ретінде жұмыс істейді.
Келешекте визалық жүйелер одан әрі цифрланып, жеңілдетіледі. Дегенмен ұлттық қауіпсіздік мәселесі басты орында қала береді.
Global Passport Power Rank рейтингінде, біздің ел паспорт күші жағынан әлемде 53-орында тұр екен. 2024 жылы 56-орында болған екенбіз. Жалпы Қазақстан азаматтары қай елдерге визасыз кіре алады?
Иә, визасыз бара алатын елдер саны жыл сайын көбейіп келеді. Биыл біздің елдің азаматтарын виза сұрамай кіргізетін елдердің саны 40-қа жетті. Былтыр Вьетнам, Макао, Марокко, Таиланд, Шри-Ланка қосылған еді. Бұл елдерге біз 60 күн визасыз жүре аламыз.
Ең ұзақ жүре алатын ел — Грузия. Онда біз әрі кеткенде бір жыл емін-еркін жүре аламыз. Сондай-ақ, Албания, Андорра, Колумбия, Хаити, Молдова, Моңғолия, Түркия, Украина, Ресейге 90 күн визасыз жүру режимі бар.
