Экономикалық қызмет түрлерінің бірыңғай классификаторында эскорт қызметі аяқ киім тазалау мен жануарларды үйрету сияқты кәсіп түрлерімен бірге ҚҚС төлеушілер қатарына енгізілгені анықталды, деп хабарлайды Skifnews.kz ақпарат порталы.
Қаржы министрлігінің мәліметінше, елде 280 мыңнан астам жеке кәсіпкер дәл осы код бойынша жұмыс істеп, жалпы 2 триллион теңгеден астам табыс көрсеткен. Оның ішінде 1,5 триллион теңге көлеміндегі қызмет заңды тұлғаларға көрсетілген. Министрлік бұл деректердің көп бөлігі нақты жеке тұлғаларға тән емес екенін мойындап, классификаторды қайта қарау қажет екенін мәлімдеді.
«Кей кәсіпкерлер бұл кодты таңдап, басқа қызметпен айналысып жүр. Сондықтан нақты рұқсат етілген бағыттарды қалдырып, қалғанын шектеу ұсынылды», – деді ведомство өкілі.
Сондай-ақ министрлік аталған жүйе 20 жылдан бері жаңартылмағанын, ал кез келген түзету алдымен Еуразиялық экономикалық одақ деңгейінде қаралуы керектігін айтты.
