Израиль Газа қаласын толық бақылауына алғысы келеді.
Израильдің жойқын шабуылдары салдарынан Газа қаласынан шамамен 300 мың адам кетті. Бұл туралы жексенбі күні қауіпсіздік қызметкерлеріне сілтеме жасаған Израиль қорғаныс армиясының радиостанциясы хабарлады, деп хабарлайды inbusiness.kz сайты Синьхуа агенттігіне сілтеме жасап.
Газа секторы Денсаулық сақтау министрлігінің мәліметінше, бір тәулік ішінде кемінде 68 палестиндік қаза тауып, тағы 346 адам жарақат алған.
Әуе шабуылдары салдарынан Газа қаласында екі көпқабатты ғимарат қираған, соның ішінде Ислам университетіне тиесілі бір ғимарат бар. Мұнда уақытша көшіп келген адамдар тұрған. Израильдің қорғаныс министрі Исраэль Кац университет ғимаратының құлаған сәті бейнеленген видеоны желіде жариялады. Израиль әскері екі биік ғимаратқа шабуыл жасағанын растады.
Израиль билігі Газа қаласын толық бақылауына алғысы келеді. Олар осылайша ХАМАС тобының көзін жойып, шамамен 50 тұтқынды босату мақсатында әскери операция бастадық деп отыр. Бұған дейін қалада шамамен бір миллион адам тұрған.
Газаның Денсаулық сақтау органдарының хабарлауынша, 2023 жылғы қазан айынан бері Израильдің шабуылдары салдарынан Газада 64 мыңнан астам адам қаза тапты.
