Африка құрлығына қызығатын елдер қатары арта бастады . Арадағы ынтымақты нығайтуға әсіресе Қытай мен Ресей ықыласты. Қос алыптың ортасындағы Қазақстан да ол континенттен ажырап қалған жоқ. 10 жылдан аса уақыттан бері құрамына 54 мемлекет кіретін Африка Одағына бақылаушы мәртебесіне ие.
Оның үстіне әлемдік сауданың болашағын картаға түсіру – жаңа жібек жолының жоспарында бар. Осы ретте Қазақстан мұхитқа шыға алмаса да тығырықтан шығар жолды біледі. ТрансКаспий халықаралық дәлізі – соған дәлел. Бірақ мұнымен шектелмей көлік-логистика саласын дамытуды жалғастырып жатыр. Президент мақсатқа жету үшін алдағы 5 жылда 40 млрд доллар инвестиция табуды талап етіп қойған болатын. Сондықтан тоғыз жол торабының бір тармағы Африкаға тартылады.
Нұрболат Нышанбай, саясаттанушы:
- Президент Тоқаевтың БҰҰ-да жұмыс істеген кезінде, одан бөлек 2017-2018 жылдары Қазақстан БҰҰ-ның қауіпсіздік кеңесінің тұрақты емес төрағасы болған. Сол жылдары Қазақстанның жобаларына Африка елдері көптеп қолдау көрсетті. Қытайдың жаһандық логистикалық жобалары Африканы қамтиды. Мұнымен қоса, Қазақстан арқылы Еуропаны да қамтиды. Менің ойымша Африка елдерімен сауда жолдарымыздың қалыптасып жатқан себебі болашақта Қытай негізін қалайтын «бір белдеу-бір жолының» үлкен тармағында, Қазақстан, екінші бөлігінде Африка болып ортақы жобаларға логистикалық негіз қалыптасады деп ойлаймын.
Африка да көпвекторлы саясатқа бет бұра бастады. Себебі шетелдік көмекке иек артып келген құрлық. Негізінен батыс донор болды. Бірақ, бір жарым млрдтан аса халқы бар алып нарық соңғы жылдары әлеуетін өзгеше пайдалана бастады. Қазір Қазақстанның Эфиопия, Оңтүстік Африка, Марокко және Мысырмен қоса 6 елшілігі бар. Қара құрлық табиғи қазба байлықтарына бай. Бірақ, өңдеу жағы кемшін. Олардың кен байыту, алтын өндіру саласында біздің азаматтар жұмыс істеді. Тараптар шикізат пен сирек металдар бойынша серіктестік орнатуға мүдделі. Сосын арамыз шалғай болса да ебін тауып, астық жеткізуге мүмкіндік бар. Сондай-ақ қорғаныс саласында байланыс бекем. Елде әскери көлік шығарылады. НАТО стандартына сай сапамен Оңтүстік Африканың озық технологиясын алған екі мемлекеттің бірі – Қазақстан.
