Бала күтіп жүрген әрбір әйел денсаулығына ерекше мән беретіні анық. Әдетте мамандар жүкті әйелдерге күнделікті рационына көкөністер, жемістер, бұршақ дақылдары мен балықты қосуға кеңес береді, себебі бұл өнімдер дәрумендер мен минералдарға бай. Алайда жүктілік кезінде тіпті пайдалы деп саналатын тағамдардың өзі қауіп төндіруі мүмкін. Сондықтан болашақ аналарға жеті өнімнен сақ болу ұсынылады, деп хабарлайды El.kz ақпарат агенттігі.
1. Газдалған сусындар
Газды сусындар әлем дәрігерлерінің алаңдатып отыр. Кейбір мамандар оларды тіпті «болашақтың темекісі» деп те атайды. Себебі бұл сусындар құрамында кофеин мен көп мөлшерде қант бар, ал газ көпіршіктері жүкті әйелде кекіру мен асқазанның қыжылын туғызуы мүмкін. Диетологтар болашақ аналарға мұндай сусындардан мүлде бас тартуға кеңес береді.
2. Қара шоколад
Қара шоколадты тәтті тоқашқа қарағанда пайдалырақ десерт деп есептейтіндер көп, бірақ жүкті әйелдер үшін емес. Қара шоколадта кофеин мөлшері айтарлықтай жоғары. Мәселен, 40 грамм шоколадта 27 мг кофеин бар, ал құрамында 80% какао болса, бұл көрсеткіш 40 мг-ға дейін жетеді.
Маңызды: Жүкті әйелдің тәуліктік кофеин нормасы – 200 мг. Кофеин балаға тез әсер етеді: оның салмағы аз болуы немесе жүйке жүйесінің дамуында ауытқулар туындауы мүмкін. Егер басқа кофеинді өнімдерден (кофе, шай, кола) бас тартсаңыз, анда-санда жеген бір плитка шоколад зиян тигізбейді.
Салыстыру үшін: орташа бір кесе кофе – 100 мг кофеин, шай – 75 мг, бір стақан кола – 40 мг.
3. Өскіндер
Шикі күйде тұтынылатын бұршақ немесе бидай өскіндері құрамында ішек таяқшасы мен листерия секілді зиянды бактериялар болуы мүмкін. Сондықтан дәрігерлер жүкті әйелдерге оларды жеуге кеңес бермейді. Сондай-ақ дайын салаттар мен дүкендегі дайын тағамдар да санитарлық нормалардың бұзылуынан қауіпті болуы мүмкін.
4. Жаңа сығылған шырын
Табиғи шырындар пайдалы болып көрінгенімен, оларды базардан немесе қолдан сатып алу қауіпті. Мұндай шырындар пастерленбеген және ішек инфекцияларын, сальмонелла бактерияларын таратуы мүмкін. Ең дұрысы – шырынды супермаркеттен сатып алу немесе жаңа піскен жеміспен алмастыру. Сонымен қатар, құрамында шикі жұмыртқа бар үй майонезі мен басқа да тұздықтардан да бас тарту керек.
5. Консервіленген тунец
Тунец – ақуызға бай, бірақ құрамында сынап жиналуы мүмкін. Бұл металл плацента арқылы өтіп, баланың миы мен жүйке жүйесінің дамуына зиян келтіреді. Диетологтардың кеңесі: аптасына екі банкадан артық тунец тұтынбаңыз немесе бір рет дайындалған стейкпен (140 грамнан аспайтын) алмастырыңыз. Сондай-ақ семсер балық құрамында да көп мөлшерде сынап кездесетінін ескеріңіз.
Кеңес: консерві өнімдерінің жарамдылық мерзімін міндетті түрде тексеріңіз. Уақыты өткен консервілер әйел мен баланың өміріне қауіп төндіруі мүмкін.
6. Шикі қамыр
Тәтті бәліш пісіріп жатқанда қамырдан дәм татқыңыз келуі мүмкін. Алайда шикі қамырда сальмонелла жұқтырған жұмыртқа жиі кездеседі. Бұл бактерия бала жолдасы арқылы өтіп, түсік, мерзімінен бұрын босану немесе нәрестенің өліміне себеп болуы мүмкін. Сондықтан тауық еті мен жұмыртқа қосылған барлық тағамды жақсылап пісіру өте маңызды.
7. Алое вера
Алое вера – пайдалы өсімдік болғанымен, оның ішке қабылдануы жатырдың жиырылуын тудыруы мүмкін. Бұл – жүктілік кезінде өте қауіпті жағдай. Сонымен қатар алоэ құрамында күшті іш жүргізетін заттар бар. Дегенмен сыртқы қолдануға (мысалы, теріге) рұқсат етіледі.
Жалпы кеңес
Дәрігерлердің айтуынша, жүктілік кезінде маңыздысы – не жейтініңіз ғана емес, қанша мөлшерде жейтініңіз. «Екі адам үшін тамақтану» деген түсінік бүгінде ескірген. Артық тамақ ішу асқазан қыжылын, кекіруді күшейтеді. Диетологтар аз-аздан, бірақ жиі тамақтануға кеңес береді. Сондай-ақ тамақтан кейін бірер минут төрт тағандап тұру ас қорытуды жақсартады.
