Ақтөбе облысы Байғанин ауданының әкімдігі туристік аймақтарға әуе рейсін ұйымдастыруды көздеп отыр, деп хабарлайды 24kz.

Ол үшін шағын ұшақтарды қолданбақ. «Осылайша, алыс-жақын шетелден туристерді көптеп тартуға болады», — дейді жергілікті билік өкілдері. Ауданда көрікті жерлер көп. Ақтолағай таулары мен Аққұм-Сағыз демалыс орны, Ақбота-Сәңкібай шоқысы сияқты экотуризм нысандары бар. Бірақ бұл жерлер шалғайда жатыр және жолы нашар.

Мансұр Есқожин, тілші:

- Ақтолағайға бет алған туристер аудан орталығынан түнгі 12-де шыққаны абзал. Себебі табиғи ескерткіштің тамашасы таң қылаң бере байқалады. Дәл қазір сағат 4-тен 19 минут кетті. Біз Тұрмамбет ойпатында тұрмыз. Алда әлі 25 шақырым жол бар.

Аудан орталығы Қарауылкелдіден Бор тауларына дейінгі аралық – 200 шақырым. Алайда, қара жолмен 5-6 сағат жүруге тура келеді. Жол талғамайтын көлік болмаса, қалғаны жете алмауы да мүмкін. Жол қиындығы артта қалып, Ақтолағайға жеткенде алдыңыздан көздің жауын алар бейнені тамашалауға болады. Күн ұясынан шығып, сәулесін шашқанда, қаз-қатар тізілген шоқылар сарғыш түске боялады. Сәлден соң борлы таулар күріштей аппақ болады.

Мансұр Есқожин, тілші:

- Ақтолағайды жергілікі тұрғындар аспан астындағы мұражай деп те атайды. Мұндағы таулар түрлі адам, жануарлардың бейнесін еске салады. Шахмат патшайымы, сфинкс, арыстан, түйе тіпті тасбақаны да байқауға болады. Дәл мына менің артымдағы тау бейне бір киіз үйдей.

Күннің қозғалысына байланысты құбылып тұратын таулар миллиондаған жыл бұрын теңіздің табаны болған. Мұнда әлі күнге дейін су жәндіктерінің сүйегі , бақалшық қалдықтары кезігеді. Талайды тамсандырған үстірт кейін халық ауыз әдебиеті мен өнер туындыларында да суреттелген.

Қостыбай Қожбанов, Ебейті ауылының тұрғыны:

- Негізінен біздің бала кезімізден үлкен әкелеріміз Алатау деп айтатын. Беріректе Ақтолағай деп аударып жіберді. Негізі Алатау деп естіп білемін. Құрманғазының күйі Алатауды осы жерде шығарған дейді.

Ақтолағайдың ең биік тұсы – 302 метр. Шахмат ханшайымы деп Германиядан келген қонақтар атап кеткен. Жалпы елге енді танылып келе жатқан туристік нысанға шетелдіктер қызығады. Алайда шалғайлығы мен инфрақұрылымның жоқтығы туризмді дамытуға қолбайлау боп тұр. Сондықтан көлік мәселесін аудан әкімдігі былай шешуді ұсынады.

Айбек Көпенов, аудан әкімі:

- Ебейті ауылына негізі кіші авиацияны орналастырсақ, аптаның бір күндеріне кесте қойып, сол кіші авиацияны ұйымдастырсақ, ол кезде тек қана Қазақстанның ғана емес жалпы көршілес елдерден келем деуші азаматтардың ынталары бар. Себебі осыдан екі жыл бұрын Германиядан, Ресей Федерациясынан қонақтар келіп тамашалаған болатын.

Байғанин ауданының тағы бір кереметі – Аққұм-Сағыз шағылы. Алтай батыр ауылы маңындағы ені 15, ұзындығы 60 шақырым болатын құм төбелер. Екі жыл бұрын бұл демалыс орнына 700-ге тарта турист тоқтаса, биыл олардың саны мыңға жуықтаған. Ауыл әкімі кұмтөбелерінің артезиан суы сарқырап тұрған тұсын алма бағына айналдыруды көздейді.

Қуандық Әбенов, Сарытоғай ауылдық округінің әкімі:

- Қосымша 70 түп алма ағашын егіп, осы жерге үлкен көлемде алма бағын ұйымдастырғым келіп отыр. Ортасына демалыс орталығы, келген адамдарға қону мүмкіндігі, біздің қазақтың ең бірінші мақтанатын қымызымыз, шұбатты да осы жерге қойғымыз келеді.

Бұл елді мекен егіздер ауылы деп те танымал. «Алтай бұлағынан су ішкен келіндер егіз табады» деген наным ел етене ішіне тараған. Алыстан арнайы келетіндер Аққұмға да ат басын бұрады. Сондықтан табиғаты тамылжып тұрған аудан халқы туризмді дамытуға ниет білдірген инвесторларды күтеді.

Авторлары: Мансұр Есқожин, Айнадин Молдабеков, Айбек Даутов