Қостанай облысының Алтынсарин ауданындағы бір шаруашылықтың малы құтырма ауырына шалдыққан, деп хабарлайды 24kz.
Ірі қараның қауіпті індет жұқтырғаны зертханалық тексеріс нәтижесінде мәлім болды. Малдың денесі бірден отқа жағылып, жойылды. Қазір ол ферма басында республикалық эпизоотикаға қарсы отряд жұмыс істеп жатыр. Кіріп-шығуға шектеу енгізіліп, барлық мал тексеріліп, екпе салынады. Мамандардың айтуынша, әзірге басқа малдардан ауру белгілері байқала қоймаған. Биыл облыста екінші рет құтырма дерті тіркеліп отыр. Біріншісінде мысықтан анықталып, одан адамға жұққан еді. «Негізгі таратушы – жабайы аңдар», — дейді ветеринарлар.
Төлеген Иманбаев, Қостанай облыстық ветеринария басқармасының басшысы:
- Қара малдың ішінде бір ғана қара мал ауру шықты. Барлығына вакцина салынып жатыр. Уақытында істелініп жатыр. 184 мың вакцина бізге түсті. Қазіргі кезде 50% істелінді. Осы ошаққа РПУ жұмыскерлері кіріп, жұмысты бастайын деп жатыр.
