Техас билігіне су тасқынынан кейін тергеу басталды. Олар төтенше жағдайға дұрыс әрекет етпеді деп айыпталып жатыр, — деп хабарлайды Massaget.kz тілшісі америкалық БАҚ-қа сілтеме жасап.
Тұрғын Кристофер Флауэрстің айтуынша, ол ұйықтар алдында ауа райы болжамын тексерген, ешқандай қауіп байқалмаған. Бірақ бірнеше сағаттан кейін отбасымен бірге тоқ көзінен шыққан сартылдан оянған. Сол кезде еденде тобықтан келетін суды байқаған.
Гваделупе өзенінің арнасынан шыққаны Керр округінде 80-тен аса адамның қаза табуына себеп болды. Өзен бойындағы Mystic атты қыздарға арналған христиан жазғы лагерінің тәлімгері мен бірнеше баланың жоғалғаны хабарланды. Кейінірек қайтыс болғанның көбі осы маңнан табылды.
Техас тарихындағы ең ауқымды құтқару операцияларының бірі басталды. Бірақ тұрғындар өзен бойындағы тұрғындарға және жазғы лагерлерге алдын ала ескерту берілмегеніне, эвакуация жайлы нұсқау жасалмағанына наразы.
Мамандардың айтуынша, егер алдын ала эвакуация жүргізілсе немесе басқа сақтық шаралары қабылданса, адам өлімі аз болар еді. Ал жергілікті билік мұндай күшті жауын-шашынды күтпегенін айтып ақталып жатыр.
Сондай-ақ өзен бойында су тасқыны жайлы сиренамен ескерту беретін жүйе жоқ екені белгілі болды. Мұндай жүйе сатып алынбақ болған, бірақ қымбат болуына байланысты жүзеге аспаған. Жазғы лагерлерде қауіпсіздік жоспары мен эвакуация шаралары болған-болмағаны да белгісіз.
АҚШ ішкі қауіпсіздік министрі Кристи Ноэм Трамп әкімшілігі Ұлттық метеоқызметтің ескерту жүйелерін жаңартуды басымдық ететінін айтты.
"Адамдарға ескертуге көбірек уақыт қажет екенін білеміз. Сондықтан біз көптен бері назардан тыс қалып келген технологияны жаңарты жатырмыз. Бұл отбасыларға дер кезінде хабар беруге көмектеседі", — деді Ноэм.
Президент Трамптан FEMA (Төтенше жағдайларды басқару агенттігі) қаржысын қысқартуды жалғастыра ма деген сұрақ қойылғанда, ол бұл сұраққа Техастағы жұмыстар толық аяқталған соң жауап беретінін айтқан.
Өзекті жаңалықтарды өз уақытында оқу үшін Facebook парақшамызға жазылыңыз!
