Павлодар облысында болған дүлей дауылдан зардап шеккен жеке тұрғындарға да материалдық көмек көрсетіледі. Төтенше жағдай жарияланған үш қала мен екі ауданға резервтен 1 млрд 800 млн теңге бөлінді. Бүгінгі күні Павлодар қаласы бойынша үйі бүлінген 15 адамға ақшалай көмек көрсетілді. Жалпы, облыс бойынша мыңға тарта өтініш түскен. Мамандар әлі де сараптама жүргізіп жатыр.
Асайын Байханов, облысы әкімі:
Төтенше жағдай жарияланғаннан кейін бір ай мерзімде әр азамат өзінің өтінішін немесе арызын түсіруге құқы бар. Жекеменшік үй болсын. Заңға сәйкес 100 АЕК көлемінде қаражат қарастырылған. Облыстың осы төтенше жағдайға арналған резервінен бөлінеді.
Облыс әкімі кезекті еңбек демалысынан кейінгі алғашқы жұмыс күнін дауылдан зардап шеккен нысандарды аралаудан бастады.
Естеріңізге сала кетейік, облыста 117 елді мекен жарықсыз қалды. 300-ден аса электр бағаны құлады. 1800 ағаш опырылып түсті. Қазір Павлодар қаласында жағдай тұрақталған. Ал қара дауыл құйындай соққан Ақсу қаласында 470-ке жуық нысан бүлінді. Қалпына келтіру жұмыстары баяу және дауыл туралы тұрғындарға ақпарат кеш таратылған. Сол себепті облыс әкімі өзінің бірінші орынбасарына, Ақсу қаласы әкімі мен аппарат басшысына сөгіс жариялады. Ал ішкі саясат бөлімі басшысы мен баспасөз хатшысын жұмыстан шығару немесе лауазымын төмендету ұсынылды.
Асайын Байханов, облысы әкімі:
Өзі қараңғыда отырған адамдарды ақпаратсыз қалдырдыңыздар. Сана-сезім жетпей ме немесе тәжірибе жетпей ме? Осы облыс әкімі келіп, сендерге ағашты жинату керек пе? Қайда билік? Қайда қуат? Кім тыңдамай отыр сіздерді? Қандай зауыт, қандай басшы тыңдамай отыр?
Болат Аманбаев
