Қазақстан Израиль мен Ираннан өз азаматтарын эвакуациялауды жалғастырып жатыр, деп хабарлайды 24kz.
Сыртқы істер министрлігінің хабарлауынша, Израильден 66 отандас Мысыр аумағы арқылы елге жеткізілді. Ираннан 78 азамат оралды. Олардың 73-і Армения арқылы, 2-еуі Әзербайжан, ал Түрікменстан арқылы 3 азаматты шығарған. Қазақстанның сыртқы істер министрлігі біздің азаматтарды эвакуациялауға атсалысқан әріптестеріне алғыс айтты. Бірлескен күш-жігердің арқасында азаматтарымыз үйлеріне аман-есен оралуға мүмкіндік алды.
Айта кетейік, Иран және Израильдегі қазақстандық дипломаттар отандастарымызға қажетті консулдық-құқықтық көмек көрсетуді жалғастырады.
Айгүл Бектенова:
-Біз Израиль еліне емге барғанбыз. Оңалтуға барғанбыз, оның алдында отаға барғанбыз. Соғыс аяқ асты басталып кетті. Қорқынышты болды, тығылып отырдық. Жағдайымыз жақсы, аман. Елшіліктер жақсы көмектесті. Коридорды дұрыс ұйымдастырған, автобустар кондиционермен, операциядан кейін адамдар келді, оларға қатты қиын болған жоқ.
Камаладин Шүкенұлы:
- Снаряд атылған уақытта олар хабар береді. Сол 10 минуттың ішінде біз төменге түсуіміз керек. «Үш күнде халықты жинаймыз да, 18-і күні алып кетеміз», — деді. Сонда жалғыз біз емес, орыстар, қытайлар болды. Бірақ олардың ешқайсында эвакуация біздікіндей болған жоқ. Міне, біз елге аман-есен келдік. Басымызды иіп, рахмет дейміз.
