Ақтөбеде жолаушылар автобусы 14 жастағы баланы жаяу жүргіншілер жолағында қағып кетті. Жасөспірімнің жағдайы ауыр, оның 9 қабырғасы сынып, іш құрылысына ауыр зақым келген. Сондай-ақ бас, ми жарақатын алған.
Бұл оқиға жолдағы көліктердің біріндегі бейнекамераға түсіп қалған. Автобустың бағдаршамның қызыл түсі жанғанына қарамастан үлкен жылдамдықпен келгенін байқауға болады. Қатты соққыдан оқушы бірнеше метрге ұшып кеткен. Қазір ол нейрохирургия бөлімінде ем алып жатыр. Жағдайы тұрақты. Жасөспірімнің туыстары тек жүргізушіні ғана емес, автобус паркін де жауапкершілікке тартуды сұрап отыр.
Ерболат Сарқұлов, облыстық ПД баспасөз қызметінің жетекшісі:
Апат салдарынан бала жарақат алып, медициналық мекемеге жатқызылды. Қазіргі таңда бұл дерек бойынша сотқа дейінгі тергеп-тексеру басталды. Оқиғаның барлық мән-жайы анықталуда.
Дәл осы Ақтөбе қаласында кеше кешкісін көп қабатты үйлердің бірінде жарылыс болып, бір адам қаза тапты. Төтенше жағдайлар Департаментінің мамандары оқиға орнына дереу жетіп, өртті сөндірді. Жалын 40 шаршы метр жерді шарпыған. Газ-ауа қоспасының жарылысы төртінші қабатта болған. Аралықтағы бетон блоктардың ішінара құлағаны анықталды. 73 адам эвакуацияланып, 11 адам жатақханаға орналастырылды. Басқалары туыстарының үйін паналаған. Әзірге жарылысқа нақты не себеп болғаны белгісіз. Бұл факті бойынша қылмыстық іс қозғалды. Бүлінген пәтерлерді қалпына келтіруге бола ма, жоқ па, ол сараптамадан кейін белгілі болады.
Әсел Айбекова, тұрғын:
Бесінші этаждағы плита құлады төртінші этажға, төртінші этаждікі үшіншіге, менің квартирама құлап тұр, спальныйге.
Евгений Овчарский, облыстық ТЖД мемлекеттік өрт бақылау басқармасының бастығы:
Әкімдік жанынан құрылған комиссия қанша пәтердің қирағанын анықтайды. Одан кейін жөндеуге бола ма, әлде үй апатты деп таныла ма, сол сұрақ көтеріледі. Әзірге бұл үйдегі үш подьездің жарығы уақытша өшірілді.
Жақсыбек Кемал
